#مسابقات_مكتبة_وهبان

#مسابقة_ريفيوهات_الألم_يحصد_الآن

مش عارفة اجمع كلام عن الرواية واكتب مراجعة بس هقول انطباعي عنها وشوية كلام كدة، هي أول تجربة مع قلم أ. دينا، كانت الرواية مرافقاني من بداية المسابقة للنهاردة، حسيت إن المسابقة جات في وقتها عشان اقرا واحب الرواية.

٧ ملفات، ب ٧ حكايات من بيوت كتير أو من عيادات كتير، فعلًا كانت الرواية من الواقع، فيه الحاسد والحاقد والخاطي واللاواعي، يمكن تلاقي نفسك بين ال ٧ ملفات، الجانب الآخر من الصداقة، العالم الوحشي، النسخة المدفونة من كل واحد.. اللي في الأغلب هتطلع في يوم من الأيام.

في الملف الأول هتلاقي لما ملهيات الدنيا من شكل ومظهر خارجي يسيطر على الشخص، مش هيشوف قدامه حد، هيعمل أي حاجة علشان يوصل للي عايزه حتى لو هيجرح، حتى لو هيدمر، كانت "أريج" مثال للي مش بيشوف غير نفسه والباقي مش مشكلة، ونقطة التربية اللي طلعت عليها مهمة جدًا، البيئة والمعاملة اللي نشأت عليها كانت من عوامل تكوين شخصيتها وتفكيرها، كان تسليط الضوء على التربية هنا مهم فعلًا.

والتاني بنبدأ ندخل فيما هو أسوأ من عدم تقبل النفس بطبيعتها، بنشوف لما الحسد والحقد يتملك شخص، يمكن في حياتي ما تخيلت إن ممكن حد يعمل اللي عمله "رضا" غير في فيلم هندي.. بس مع التعمق والمَشي في الحكاية بنلاقي إن كانت الصدمة مأثرة عليه بدرجة عالية، وهو كان كابت الشخصية التانية منه يمكن فطلعها علينا كدة.

معرفتش اتعاطف معاه للدرجة اللي تخليه يعمل تصرفات زي اللي حصلت، خصوصًا لما قريت ملف "هادي" واتفاجأت بالربط بينهم، كنت مصدومة من الربط والحبكة بتاعت الرواية اللي كنا كل ما نتقدم نلاقي الموضوع بقي معقد ومثير أكتر.

الملف الرابع كان مفاجأة، على الرغم إن موضوعه حساس، الكاتبة صاغته بطريقة كويسة جدًا، بس التغيرات اللي حصلت ل"غالية "كانت صعبة وشديدة جدًا على بنت صغيرة وبقول صغيرة لأنها يعتبر معاشتش سنها صح كبرت كسن وبسبب الحاجات اللي خلتها زي ما بيقولوا تشيّب، بس لو جينا للواقع الحاجات دي موجودة عادي وبتحصل وفي بيوت كتير للأسف.

الملف الخامس شايفة أنه منتشر جدًا في الوقت الحالي، اللي فاقدين الشغف في الدنيا دول كتير، تيجي تقولهم تعالوا نروح كذا يقولك لا، طيب نعمل دة يقولك لا، حياته مقتصرة على حاجات أقل من الإنسان الطبيعي بيعملها، والتربية هنا في شخصية "سيف" كانت عامل مهم جدًا في اللي وِصله، عدم معرفة التعامل مع الأطفال اللي زي "سيف" كانت مشكلة واضحة جدًا في الملف، طاقة كانت مش متوجهة صح، وفيما بعد كان فيه طاقة مكبوتة اراديًا، كان أكتر حد تعاطفت معاه، ملف صعب واستغلال الطبيب كان أصعب.

الملف السادس للعصبيين😂

بس العصبية هنا كانت من منظور صعب جدًا، فكرة لما تتملك منك وكمان متقدرش تتحكم فيها، عصبية مش بتخليك تفكر لمدى بعيد مش وقت قصير حتى.

الملف السابع والباقي من الحكاية كان كله صدمات، يادوبك تخلصه وتلاقي بقى بوابل من الصدمات، من أول اكتشاف حاجات ليها دور كبير في الرواية لحد النهاية.

الرواية لغتها حلوة وبسيطة، سرعة الأحداث كانت مناسبة جدًا، كم الرسايل في الرواية كتير بالنسبة لحجمها فبجد دة حلو أوي، الحبكة والنهاية كانوا عبارة عن كتلة مفاجآت.

نقطة اختيار الاسماء كانت حلوة وملفتة.

تسلم إيدك وأفكارك على الرواية الحلوة أوي دي🤩🤩🤩