عملية بلا حدود أو نقدر نقول رحلة مطاردة في أنحاء دول أوروبا و أمريكا.
تفتكره ايه الرابط بين اختطاف دكتورة انثربولوجيا في باريس و بين مقتل مصرفي عربي في نيس ؟
طب ايه الرابط بين مقتل مصرفي عربي تاني في ميلانو!
طب ليه فجاة مسرح الأحداث هيتحول من أوروبا ل أمريكا ؟
القضايا كان بيتم التعامل معاها علي أنها حوادث فردية لحد ما المحققة جايا فيرجيلي من اليوروبول بتبدأ تكتشف الرابط و أني القضايا مرتبطة ببعض و تبدا تطارد الأحداث مع المحقق دومينيك مفوض شرطة باريس و فريقه و كشف الأحداث بيكشف عن قضية أكبر سرقة في العالم و هتقلق منام شرطة العالم.
رواية عملية بلا حدود رواية بطعم و روح فيلم حسيت أني جوه سيناريو فيلم و مشاهد محتاجة تتصور بس و تتعرض علي الشاشة ،و بستغرض ليه م متحوله لفيلم رغم أنها فيها مقومات أكشن و تحقيق و جرائم.
اللذيذ في الرواية أني كنت شايف الأحداث من الطرفين العصابة و الشرطة ،يمكن مش اعمق حبكة لراوية لكن المفاجأة بالنسبالي كانت في نهاية العمل و كلمة المؤلف و بيوضح فيها أني جزء كبير من أحداث العمل حقيقة و حصلت في عام ٢٠١٣.
الرواية كانت بتجري في القراءة و برغم وجود أشخاص كتير الا اني قدرت اكون مميز الشخصيات الرئيسية في العمل.
نيجي لنقطة الترجمة برغم أنها في اغلب الرواية كانت جيدة جدا الا اني عندي بعض الملاحظات عليها في اختيار بعض الكلمات مثال اختطاف الدكتور كانديس من كلية السوربون أعتقد كان الصح يبقي من جامعة السوربون،لكن مفيش اخطاء قصرت في فهم أحداث العمل.
العمل متوفر علي تطبيق أبجد.
تقييمي و ده عشان حالة الاستمتاع ٤ نجوم