اصل الأنواع - احمد عبداللطيف
استيقظ جريجور سامسا ذات يوم بعد احلام مزعجة، فوجد نفسه تحول في سريره الي حشرة عملاقة"
افتتاحية كافكا العظيمة، بس لو سألت داروين ممكن يعدل فيها ايه، مش هيخلي جريجور سامسا يصحي فجأة يلاقي نفسه حشرة، هيقولك أن تحول الكائن من سلالة لسلالة بيحصل علي هيئة مجموعة من الطفرات والتغيرات البسيطة. ولو سألت كرونينبرج، هيخلي سامسا يفقد شعره الأول، بعدين صوابعه، بعدين صوابع رجله، لحد ما يتحول لحشرة
بس لو رجعت سألت لداروين تاني، ممكن يقولك اشمعني جريجور سامسا بس اللي بيتحول؟ الانتخاب الطبيعي بيسري علي الجماعات وليس الافراد، مجموعة بشرية في نفس الظرف الزماني والمكاني، بتمر بنفس الظروف الطبيعية الصعبة اللي بتجبرها علي الطفرات والتحور. ولو سألت في المحل اللي جنبنا ممكن يقولك أن كدا رصد التحول هيبقي رصد للبيئة والظروف اللي أدت إلي هذا التحول
وبناء عليه، هتكون رواية اصل الأنواع دي هي من أهم التعليقات والتوصيفات لهذا العصر الحالي من تاريخ مصر ، رمزية شديدة القوة والأهمية والفجاجة والاستفزاز.
أما بقي لو سألت احمد عبداللطيف عن رأيه في افتتاحية كافكا، هيقولك: ايه القرف دا يا عم دي فيها علامات ترقيم.
عمل غريب ومستفز ومهم، يتشارك كتير مع رواية "٣٢ ديسمبر" لأبراهيم عبدالمجيد في سؤال الجدوي، في قد ايه هذا اليأس والعدمية اللي عصر زي دا قادرين يخلقوهم، ممكن يترجموا لتجريب اسلوبي، ولسؤال عن الجدوي. ابراهيم عبدالمجيد بيوصل بيه الموضوع لتجربة تفكيكية أن "ليه اصيغ الأفكار والمشاعر والأحداث دي في شكل درامي روائي"، وأحمد عبداللطيف بيدخل في فكرة ضمور اللغة، أن الإنسان لما بيتحول كدا لغته بتتحول معاه، فبيقوم يشيل علامات الترقيم كلها. ليصنع اسلوب هو خليط بين نصوص مقدسة وطريقة كلام انسان بدائي