❞أنا أتلذذ بالبحث خلف أدق تفاصيل الجرائم وما يدور خلف الكواليس❝
ضابط شرطة بيتفصل من كلية الشرطة و بيتحول لدراسة اعلام و لكن بيفضل محتفظ بشغف و حب حل الجرائم فيبدا يقدم محتوي عن الجرائم و تفاصيل حلها و احداثها فنقدر نقول اني شاكر المنياوي بطل السلسة شبه سامح سند في الحديث عن الجرائم و تفاصليلها .
لحد ما بيقع تحت ايده قضية بدون حل لمقتل سيدة بطلق ناري في قرية و بيتعرف انها مختفيه من ٤ سنين.
لغة العمل و التفاصيل و الشخصيات ممتازة من الكاتبة و اللي بالمناسبة دي اول قراءة لقلمها ، حبيت شخصيات فريق شاكر جدا و أعتقد في خطوط ممكن تتفتح أكتر ليهم في الأعداد الجاية.
شخصية شاكر بالتناقضات اللي فيها كومبو حلو و مميزة ،تحسه كده طيب و شرير شيخ شوية و فلتان شوية ،من الآخر تحسه أنسان طبيعي له و عليه.
عشان مش عاوز احرق تفاصيل كتير من العمل فأنا توقعت النهاية هتروح في السكة اللي اتعمدت الكاتبة تظهرها شوية و خصوصا بعد لقاء شاكر و ولدة الضحية ،لكنها قدرت تضحك عليا و توديني في سكة و الحل طلع مختلف.
الرسم في العمل كانت ممتازة.
لو عندي نقد صغير هيكون في طول مدة إقامة شاكر في القرية بدون حدوث أحداث سريعة كان ممكن يكون الجزء ده أسرع ،أو نضيف عليه تواصل مع فريقه بيحكي وصل ل ايه.