أول ما لفت نظري هو غلاف الرواية: شكله الخارجي كان جذاب جدًا، والاسم كمان كان موفق وبيشجع على القراءة.

رواية بتتميز إنها خفيفة من حيث اللغة وخفيفة الظل، وده شيء إيجابي بيخليها سهلة القراءة وقريبة من القارئ. القصة نفسها فيها قدر من الاختلاف عن المعتاد، لكن في نفس الوقت ما زالت محافظة على بعض ملامح النوع ده من الروايات، فبتجمع بين الجديد والمألوف.

من النقاط اللي لفتت انتباهي:

شخصية ماستر خالد: في البداية تم تقديمه كصاحب القرية، ثم لاحقًا كمديرها فقط. التناقض ده خلاني أحس إن في تضارب في دور الشخصية، خاصة مع ربط الأمر بكونه مهتم بالقرية لأنه مجددها وصرف عليها..

رغم ده، السرد كان متماسك والشخصيات بدأت تبان بوضوح مع تقدم الأحداث.

أما بالنسبة للجانب البوليسي، فالحبكة كانت متوقعة بالنسبة لي:

القاتل كنت متوقعة هويته من بدري، وده قلل شوية من عنصر المفاجأة. لكن فضولي خلاني أكمل لأجل النهاية.

النهاية اتسابت مفتوحة من غير تأويل كافي أو إسقاط على نفسية البطل. وهنا كان عندي توقع مختلف: بما إن شخصية البطل تميل بطبيعتها للبحث عن الحلول والنهايات، كنت متوقعة أن الخاتمة تعكس ده، أو على الأقل تعطينا قفلة أو إشارة تتناسب مع شخصيته.