المراجعة التاسعة

المجموعة القصصية : حقاً

 الكاتبة : رانيا عايد الرباط

 دار النشر : دار أقلام عربية للنشر والتوزيع

 الصفحات : 124 على أبجد

مجموعة قصصية أول مرة أقرأ فيها للكاتبة.. والتجربة كانت مختلفة فعلًا.

 القصص قصيرة، لكن كل واحدة ليها عالم خاص وأجواء مميزة.. تلاقي نفسك دخلت في القصة من غير ما تحس، ومع السطور القليلة تبتدي تعيش مع الأبطال كأنك عارف تفاصيل حياتهم.

اللي شدني أكتر إن القصص مش مجرد حكايات والسلام، لأ.. كل قصة وراها فكرة أو رسالة، وبعضها وجعني جدًا وخلى قلبي يتقبض، وبعضها خوفني وخلاني أقرأ وأنا في حالة ترقب، وفي قصص حسيت معاها بواقعية تخليك تفكر في اللي بيحصل حوالينا.

 الأسلوب بسيط وسهل، مش معقد.. لكن فيه دقة في الوصف تخليك شايف المشاهد قدامك.

 حبيت إن القلم صادق ومباشر، مفيش تطويل ممل.. ومع كده بتحس بثقل الأحداث والمواقف.

 الكتاب قصير من عدد الصفحات، بس مليان مشاعر وأفكار تخليك توقف بعد كل قصة شوية وتستوعب.

 بالنسبة لي كانت تجربة ممتعة جدًا، وخلتني حابة أتابع الكاتبة وأشوف أعمالها الجاية.

الكتاب خلاني أعيد التفكير في حاجات حوالينا وحسيت إن القصص رغم بساطتها تقيلة جدًا .. وبعض القصص كانت بالنسبالي كوابيس مريت بيها فعلا بالحقيقة 

#شغف_الكتب

#فنجان_قهوة_وكتاب

#شغف_الكتب_الموسم_الخامس