المراجعة الثانية

رواية/ لعنة روينة

اسم المؤلف/ شيماء عاطف

دار النشر/ دار ريشة للنشر

الغلاف/ في الأول ماخدتش بالي منه غير إنه لطيف.. وسألت نفسي ايه الرواية الفانتازيا اللي هتكون مرتبطة بيه، بس فهمت أن الهدف انه الخوف ساعات بيكبر جوا عقلنا لدرجة إننا نشوف الحاجة أوحش من حقيقتها.

القصة/ مدينة "روينة" اللي مليانة خير، بس ساكن فيها خوف أكبر من أهلها 😂 كل ليلة قمرية الناس مستنية وحش اسمه "نيان" ينزل يقتل ويمشي.. وأنا طول الرواية بسأل: هو فعلاً موجود ولا أسطورة؟!

الأسلوب/ اللغة فصحى سهلة وسلسة، مفيش أي تعقيد.. خلصت الفصول من غير ما أحس إني مضغوطة.

الشخصيات/ حبيت أقحوانة جدًا.. نقية وشخصيتها قوية رغم رقتها. صليل وماهر وفريد حسيتهم أبطال جدعان، والحاكم ميمون حبيت إنه حاول يصلح، مع ان كنت شاكه أنه يكون ورا المصائب دي.

الإيقاع/ البداية حسستني بغموض، بس بعد كده الأحداث شدتني.. خصوصًا فكرة إن الجهل والخرافات ساعات بيتغذوا عشان الناس تفضل خايبة تحت السيطرة.

المشاعر/ أكتر حاجة استفزتني إن في ناس بتستغل جهل وخوف الناس عشان مصلحتهم. وفي نفس الوقت عجبني إزاي الكاتبة بينت إن اللي يواجه الخوف بالعلم والمعرفة بيكسب في الآخر.

الانطباع العام/ رواية دمجت بين الأسطورة والواقع بشكل ممتع.. عجبتني وفكرتني إن الخوف عمره ما يكون حل.

وطبعا مننساش أن الأسطورة دي من ابتكار الكاتبة

التقييم النهائي أنها رائعة وفيها فكرة مميزة جدا وكمان عبرة