الريفيو : التاسع
اسم الكتاب: حلم عز (رحلة صعود إلى القمة)
تأليف: الناقد السينمائي رامي المتولي
دار النشر: دار ريشة للنشر والتوزيع
الكتاب ده بيأخذنا في رحلة مشوار الفنان أحمد عز من بدايته لحد ما وصل لقمة النجومية. من الصفحات الأولى، يوضح لنا الكاتب إن التمثيل كان حلم عز من صغره، حتى إنه شارك في مسرحية وهو في الصف الخامس الابتدائي بدور صغير. لكن وسط عيلته، الأولوية كانت إن ياخد شهادة تنفعه في سوق العمل، لأنهم ما كانوش شايفين التمثيل مهنة. بالفعل اشتغل في الفنادق حسب دراسته، وده ساعده يخطو أول خطواته لتحقيق حلمه.
الكاتب يقسم مشوار عز لخمسة مراحل رئيسية:
🔹 المرحلة الأولى:
بدأها كـ "موديل" في الإعلانات، وبعدها شارك في أدوار صغيرة زي: سمكة وأربع قروش – كلام الليل – الشرف. الأدوار دي اعتمدت على الوسامة والمظهر.
🔹 المرحلة الثانية:
الانطلاقة الحقيقية كانت بفيلم مذكرات مراهقة، اللي كسر شباك التذاكر. وبعد توقف 3 سنوات، رجع بمسلسل ملك روحي مع يسرا، وبعده حب البنات وسنة أولى نصب. هنا بدأ ياخد بطولات جماعية وحقق نجاح ملحوظ، خصوصًا في سنة أولى نصب. لكن عز كان خايف يفضل محبوس في قالب "الفتى الوسيم الرومانسي".
النقلة جات بفيلم يوم الكرامة، المبني على أحداث حقيقية بعد نكسة 67، وهنا قدم عز شخصية عسكرية مختلفة أثبت بيها إنه قادر يخرج من القالب الرومانسي.
🔹 المرحلة الثالثة:
مرحلة السيطرة على شباك التذاكر بفيلم ملاكي إسكندرية، اللي نجح جدًا. بعدها فشل في شباب تيك أواي لكن ما يأسش، ورجع بقوة بـ الرهينة اللي لحد دلوقتي جمهور السوشيال ميديا بيستعين بجمله ومشاهده في الكوميكس والميمز.
🔹 المرحلة الرابعة:
مرحلة النضج والاستمرارية. بقى ليه فيلم تقريبًا كل سنة، وأحيانًا فيلمين في نفس السنة. بدأها بـ الشبح، وبعده مسجون ترانزيت مع نور الشريف اللي حقق نجاح كبير، وطلعت منه مشاهد مشهورة حتى الآن ع وسائل التواصلالاجتماع
قدّم بعدها بدل فاقد، ومسلسل الأدهم في رمضان، اللي الجمهور كان مستني حلقاته يوميًا.
اتوالت بعدها أعمال قوية زي: 365 يوم سعادة – حلم عزيز – المصلحة (اللي اتعرضوا في نفس السنة وكان بيتحدى نفسه في أدوار مختلفة تمامًا)، وبعدهم الحفلة وختم المرحلة دي بمسلسل الإكسلانس.
🔹 المرحلة الخامسة:
مرحلة البطولات الكبيرة والنجاحات الضخمة: أولاد رزق – الخلية – أولاد رزق 2 – الممر – العارف – كيرة والجن – الجريمة – وأولاد رزق 3. دي المرحلة اللي رسخت اسم أحمد عز كواحد من أنجح وأكبر نجوم السينما في مصر.
وفي النهاية، الكاتب مش بيحكي الأحداث من بعيد، لكنه بيحاول يحكي بلسان أحمد عز نفسه، وبيوضح الظروف والمواقف اللي واجهها في كل مرحلة من مراحل صعوده، لحد ما وصل للقمة.
#شغف_الكتب
#شغف_الكتب_الموسم_الخامس
#فنجان_قهوة_وكتاب
#ابجد