كتاب "مسافة آمنة" للكاتبة عزة سلطان
وأنا بقرأ مسافة آمنة كنت حاسة إني مش بقرأ كتاب بس
كنت ماشية جوا أفكاري… كأن الكاتبة ماسكة إيدي، وبتوريني حاجات أنا كنت بتجاهلها من زمان.
الكتاب بسيط في طريقته، لكن عميق جدًا في معانيه.
مش بيقولك تحب إزاي، ولا بيحكم على اختياراتك
هو بس بيفتح عينك على حاجات بتحصل فعلاً في كل علاقة…
وإنت حر تفهم منها اللي يناسبك.
_أكتر حاجة أثرت فيّ كانت فكرة "الاحتياج العاطفي".
إزاي ساعات بنفتكر إننا بنحب، وإحنا في الحقيقة بس بنحاول نملأ فراغ جوانا.
وقفت قدام الفكرة دي كتير، لأني لقيتني فيها.
أوقات كتير كنت بتمسك بحد مش عشان بحبه، بس عشان حاسة إنه بيكمل حاجة ناقصة جوايا.
_ومن غير ما أخد بالي خلاني أفكر:
أنا إزاي بدخل العلاقات؟
هل بسيب مساحة لنفسي وللطرف التاني؟
ولا بسيب مشاعري تجرّي كل حاجة؟
الكتاب بيأكد إن الحب مش اندماج كامل
لكن فيه دايمًا مساحة لازم نحافظ عليها…
مسافة آمنة… مش بُعد، بس مساحة تخلي كل واحد يعرف نفسه جوّا العلاقة.
_وحقيقي أنا مش شايفة نفسي في حكاية واحدة…!
أنا متوزعة على كذا موقف كذا إحساس.
القلق، الخوف من الفقد، التعلّق، وحتى الرغبة في إن العلاقة تستمر بأي شكل…
الكتاب لمس كل ده من غير ما يجلدك ومن غير ما يقولك إنك غلط.
هو بس بيحط نقطة نور على كل حاجة بتحصل جوانا
وبيفكّرنا إن الحب محتاج وعي مش بس مشاعر.
__في الآخر، "مسافة آمنة" ماكانش كتاب عن العلاقات…
كان كتاب عنِّي…
عن الحتة اللي جوا كل واحدة فينا اللي بتحاول تحب بطريقة أنضج وأكتر أمان لنفسها.