" لكل بيت قصة يرويها ، وسر يذيعه "
مبدأيا كدا لازم نقول ثوابت أدبية هعتمدها من النهاردة وبحكم خبرتي : أي عمل من ترجمة شيرين هنائي لازم تقرأه وانت عارف انك قدام عمل هيتقيم 5/5
مشوفتش سلاسة ترجمة وأسلوب ومصطلحات بالجمال دا من مدة ، انا تقريبا حاسس ان العمل مكتوب بالعربية الفصحى من كتر ما الشخصيات لغتهم مظبوطة ❤️❤️❤️ شيرين هنائي
سر جمال الرواية دي بدون حرق بيكمن في انه مش عاوز يوريلك اسراره كلها الا في اخر صفحة ، ولكن مش هيفضل يشوقك ويحصل تمطيط وبس ، لأ انا كل فصل هكشفلك حقيقة جديدة وبترتيب زمني منطقي، ومع ذلك بردو هتفضل مش فاهم حاجة لاخر لحظة ، بل كمان انت مش هتبقى فاهم المفروض الرواية دي تروح ناحية انهو تصنيف الا في اخر صفحة بردو ، وبالرغم ان الرواية هتعدي بيك على تصنيفات كتيرة جدا ومش هتتخصص في لون واحد
لكن هتديك جرعة مرضية في كل لون
يعني عاوز رعب ؟ هخليك تقرأ أجمل وارعب المشاهد المرعبة بالكربون من اللي بتشوفه في الأفلام
عاوز جريمة ؟ تعال في اكتر من جريمة وشارك معانا في حل اللغز
عاوز غموض ؟ هتفضل تروح وتيجي بين زمنين والبطل هو المكان وكل فصل هديك لغز جديد وهكشفلك اللغز اللي قبله وحاول تحل قبلنا بقى
وفي النهاية هتلاقي تركبية عبقرية
تويست جوا تويست جوا تويست ، كمية التوائات هتمر بيها هتضرب عقلك
كمان الشخصيات مكتوبة بحرفية شديدة جدا والوصف عبقري ولو كنت شاطر شوية في الخيال هتقدر تتخيل كل شخصية بسهولة من جمال تجسيد الشخصيات واسلوبهم المتميز والمختلف
الرواية دي 5/5 بامتياز ❤️❤️❤️
وشكرا لأدب الرعب اللي هفضل متيم بيه لاخر يوم في عمري ❤️