بسمع كتير جملة بتتقال على السوشيال ميديا
" اعرف ابنك وعلم عليه " من باب قال يعنى انت فاهم احسن منه كده او " أنا ماما يلا" 😄
حلو لو هناخد الموضوع بهزار صح
اللى هو أنا أم أو أب updated مش eold fashion يا عيال على رأى مش عارفة مين " اللى أنت نفسك تعمله ياض أنا عملته وبطلته " 😎 ويعنى كده أنت معاه على نفس الخط …
لكن لو اخدنا الجملة بالمعنى اللى فى القصة هنلاقيه👇🏻👇🏻
" اعرف ابنك وعلم عليه وعقده لحد ما يكره اليوم اللى جه فيه " هو مش مقصود أكيد بس من باب هذا ما وجدنا عليه آباءنا واللى ماداقش الحنبة فى بيت أهله فى الأغلب هيطلعه على اللى جاى من بعده🤦🏼♀️
ليه الأهل دايما بيشوفوا نفسهم صح ✔️ يعنى هل version الأب والأم لازم يبقى كده فى أى زمن أو وقت
📌أنا عارف مستقبلك اكتر منك
📌أنا فاهم أحسن منك
📌أنا شايف اللى يناسبك مالكش أنت دعوة
📌كل اللى موجود بدل ما النعمة تزول ( تمام بس أنا ما بحبش السبانخ عادى 😭 مش هتجرى ورايا يوم القيامة إن شاء الله ومش معناها أنى عاق😭)
طيب مش هما لما كانوا صغيرين برضه كان بيتعمل فيهم كده وبيبقوا متضايقين 🤔
طيب بديهى بقى لما يكبروا كده ويعملوا شيفت كاريير من الطفولة للأبوة أو الأمومة يبقى النسخة معمولها ابديت … تساير كل جديد وتعمل delete للعقد والكلاكيع علشان ما يتعملش منها paste لـfolders كتير 😉
أكيد مش فى المبادىء والأصول بس على الأقل اللى اتعقدوا منه زمان ما يطلعهوش على الجيل اللى جاى ولا ايه 🤷♀️
فاكر أنك أب وأم مثاليين… بتحبوا ولادكم وبتخافوا عليهم وشايفين أنكم عاملين اللى عليكم 🤔
طيب ماذا لو اتفاجأت أن كل ده مش صحيح 🥺
وياشماتة السوشيال ميديا فيك
لما ولادك اللى كنت فاكرهم تحت طوعك وبيسمعوا الكلام كبروا واتمردوا على الوضع الحالى… على رأى عمرو دياب
وطلعوا لايف ونشروا الغسيل 🧺 عقد وكلاكيع 🥺
يرضيك ابنك أو بنتك من خنقتهم يطلعوا يحكوا قصتهم على السوشيال ميديا وتبقى سيرتكم على كل لسان
طيب يرضيكم بقى أنهم ياخدوا قصتهم لأبعد من كده كمان ويكسبوا منها فلوس وهدايا وكبسوا كبسوا 🤏 ويلموا مشاهدات…🤦🏼♀️ ما هى الناس تحب الفضايح والتسييح وكله بيعمل شير من غير تفكير ..
أنت عملت اللى عليك وفرت بيت وأكل وتعليم صحيح براڤو عليك. 👏🏻 جريت وشقيت وعملت اللى تقدر عليه… بسميه سعى بقرف مش بسعادة فيه فرق … عارفة المسؤولية مش هينة لكن لما بتشوف فرحة ولادك باللى بتعمله بيهون عليك أى تعب .
لكن للاسف نسيت فى سعيك توفر الأهم احتواء وحب واهتمام وطبطبة وشوية حنية يا ناااااس
ده فيه اهالى بتزعق لولادها لما يتعبوا علشان ما لبسوش فانلة واخدوا برد 😄🤦🏼♀️
أنك تسمع مشاكلهم حتى لو كانت تافهة لك هى بالنسبة ليهم جبل ⛰️ ممكن بقع علبك
وده اللى حصل مع عيلة شلبى
فقدوا روح الأسرة والحوار والتواصل فكتموا فى نفسهم وتخبطوا وتشتتوا ولما اجتمعوا اجتمعوا على غلط… الطرفين غلطوا فى حق بعض.
بس ياترى غلطهم هيصحح الوضع وهبفوق الكل ولا مفيش فايدة
رواية اجتماعية أسرية بأسلوب ساخر صحيح
بس ما يمنعش أنك هتفكر فى كلامها اللى بين السطور كتير ..
هل أنت أب وأم مثاليين ومن وجهة نظر مين ؟😉
محتاج تراجع نفسك شويتين وبلاش نظرية اللى اتعمل فينا وبلعناه زمان نطلعه عليهم ونكرهم فى الحياة لحد ما نلبس فى مطب قدام 🤷♀️
#مكتبة_دنيا
#قراءات_٢٠٢٥