#مهرجان_كتوبيا_في_فنجان_قهوة_وكتاب
#فنجان_قهوة_وكتاب
تحذير⚠️⚠️⚠️⚠️⚠️⚠️⚠️⚠️⚠️⚠️⚠️⚠️
المراجعة فيها بعض الحـ.ـرق للأحداث
........
❞ «بُح بإحساسك يا أبي لعلَّنا نتَّكئ أحدُنا على الآخر، أنا في حاجةٍ لمتَّكئ وأنتَ كذلك، لو ظللنا هكذا سنتهاوى أكثر ممَّا تهاوينا، المرءُ طائعٌ لقدرِه مهما التبسَ عليه هذا القدر واشتبَه، كم مسرَّةً اجترحنا قبلذاك وكم فاجعةً اجترحتنا!». ❝
هبدأ المراجعة دي باقتباس لمسني، الرواية كلها مشاعر، رواية فانتازيا بس مش من الروايات اللي ممكن تبقى صعبة في فهم عالمها أو ما شابه.
رواية عجبتني بكل تفصيلة فيها، برغم عدم تفضيلي لتصنيف الفانتازيا المنتشر أكتر في الروايات، بس هي فانتازيا مكتوبة بشكل حلو جدا، مفيهاش حاجة خارقة ولا سوبر مان بيطير ولا حمار بيتكلم حتى، لكن فيه رحلة مع الجنين اللي بيتكون في رحم أمه، في وسط قرية ملعونة بلعنة قديمة محدش يعرف إيه الاقاويل الصحيحة
❞ قيلَ إنَّ لعنةً قديمةً حاقتْ بهذه القرية، ذلك يومَ أقسمتِ الأرضُ ألَّا تُنجب مِنْ رحمها شيئًا جديدًا، بعْدما اغتصبتهَا يدُ البشرِ فمزَّقتْ شجرَها، ودفنتْ تحتها بذورَ الموت.
وقيلَ أيضًا إنَّ اللَّعنةَ نزلتْ على القرية بسبب خيانةٍ قديمةٍ لمْ يُكشف عنْ سرِّها قط.
وفيما قيل إنَّ اللَّعنةَ القديمةَ زرعها كيانٌ أسطوريٌّ يُدعى ظِلُّ الأبديَّة، قالتِ الأساطيرُ إنَّه سرق جذورَ الحياة ودفنها تحت شجرةِ الفنَاء، تلك الشَّجرة التي لا يُسمح لأحدٍ برؤيتها إلَّا إذا تجاوز متاهةَ الأوهام. ❝
بياخدنا الجنين في معاناته مع مراحل تكوينه، وهل الجنين دة هيشوف النور ولا هيبقى في شجرة الأطفال اللي لم ولن يولدوا؟!
بيجي جنين بيحارب مع باقي الأجنة على البقاء، وبيعرف إزاي بتضحيته هو هتتفك اللعنة، وفعلًا بيضحي، وبيجي أول ذكر للقرية بعد اللعنة، وبعد محاولات النساء في المحاولة مع المنطقة الصخرية مع التمثال، مش عارفة إزاي هما كناس طبيعي يصدقوا أن ممكن تتفك اللعنة بمجرد تقديم قرابين أو نفسهم لتمثال! اللي مش بيتحرك ولا بيديهم أي ردة فعل زي ما الأسطورة أو هما فاكرين!
بعد ما بيتولد أول جنين بنعيش فعلًا رحلته الباقية، من الفقدان والمحاولات والاكتشافات الجديدة عليه، لحد هنا حلو جدًا علشان لو حد فكر يجرب يخوض تجربة القراءة في الرواية، أنا حكيت جزء كبير من الرواية وهعمل تنبيه في أول المراجعة إن ممكن يكون فيه حـ.. ـرق للأحداث.
أسلوب الكاتب كان حلو جدا، دي تاني تجربة في القراءة للكاتب أدهم العبودي، اللي بأسلوب وروايته خلاني أنجذب للرواية وأخلصها في وقت قليل، بعد ما بقالي اسبوع مش عارفة اقرأ ٦٠ صفحة على بعض من رواية واحدة حتى!
اللغة بتاعت الرواية عذبة وحلوة وسلسة جدا مش هتخليك متعقد من الرواية أو القراءة فيها، هو بيوصل المعنى العميق بأسلوب ولغة حلوين جدا، زي ما بدأت المراجعة باقتباس وذكرت إنه لمسني فدة حقيقي لأن الرواية فيها مشاعر كتير، وحسيت بيها فعلًا، لغة الكاتب بتلمس القلب فعلًا، وقت ما الولد اتكلم عن مامته، وإنه بيحس باحساس حلو جدا لما يقعد يتكلم جمب قبرها أو الدفء اللي بيحصله بمجرد ما يلمس التراب اللي مدفونة بيه، كنت حاسة بكل حاجة معاه، وقد إيه الشعور دة متناقض، هو مبسوط وبيحس بدفء لما يقرب من قبر أمه، وفي نفس الوقت حاسس بمشاعر الحزن على فراق أمه اللي هي كانت محور حياته، وأكتر حد مهتم بيه.
عرفت المعلومة دي لما بحثت عن الرواية والمراجعات بتاعتها علشان اتحمس واعرف أكتر عنها، الكاتب كان شغال على الرواية من 2019 أو قبل، كان بيواجه هجوم لعدم نشرها، بس في 2025 حصل واتنشرت، فتفتكروا هتكون الرواية مثيرة للجدل ولا هي فعلًا حلوة ومش بتثير الجدل أو بتتدخل حاجات ملهاش لازمة؟؟
رواية سرقت مني النوم، قيمتها 5 نجوم، لأنها تستحق فعلًا، كل حاجة فيها عجبتني على غير العادة
أنصحكم بتجربة ممتعة في رواية صلاة الأجنة✨
......
العمل: صلاة الأجنة "أساطير التكوين والفناء"
الكاتب: أدهم العبودي
عدد الصفحات: 158
عن دار كتوبيا للنشر والتوزيع