فى شارع غيط العنب
بيوت 🏡 كتير متبهدلة
ناس شقيانة ومن الهموم متهانة
فيهم الراضى بعيشته
واللى متأقلم مع وضعه
وحامد ربه وشاكر فضله
أن فيه حيطان ستراه
وسرير فى آخر الليل عليه ينام
وأكله لو بسيطة تسد جوعه عن سؤال اللئيم
وفيهم اللى ساخط على حاله
ومكفر كمان عياله
عاطل عن العمل وبيشتكى من الزمن
ومعندوش مانع يستحل مال الشقيان
وهو قاعد قعدة مزاج
وغيرهم اللى أمله يهرب لبعيد
يهرب من اللى هو فيه
من قلة الحيلة و الشغل الرخيص
اللى يهد وما يبنيش
وياكل من عمره سنين وسنين
وغيرهم كتير وكتير بيوت مليانة حواديت
وأحلام عمالة تطير بعيد
وبقيت صعبة التحقيق
لحد ما تهل بشاير الخير
مشروع تطوير
هنهد المنطقة ونعمل كباري غالباً 🤫
ملناش دعوة خلينا فى غيط العنب
هناخد بيتك القديم ونديك مكانه واحد جديد
مفروش ومتظبط عليك أنت بس تدخل وتأنتخ
فرح الأهالى وهيصوا
يا فرج الله هيتغير الحال
وهنسكن فى حتة تمام ويتقفل علينا باب
شوارع نضيفة وحياة كريمة
بدل البهدلة اللى احنا فيها
و يتشقلب حال أهالى غيط العنب
وتتغير نفوس الأهل على بعض
ومش بس كده الجيران كمان
كله مستنى الدور
اسمى هيطلع امتى فى قرعة التسكين
ده انت يا دوب مأجر غرفتين
انا المالك الاصلى وانت مالكش فيه
يعنى ايه
هنترمى فى الشارع ولا ايه
اثبت انك ليك فيه وان بينا عقد من سنين
وخد بقى من ده كتير
مشاكل بالعبيط
قلبت الناس على بعض
والطمع ساد فى الحى
مش بعيد تلاقى الاخ ببطرد أخوه ويفتكر ورث أبوه
والابن والابنة اللى هاجرين أمهم من سنين وعنها مش سألين دلوقتى افتكروا بر الوالدين أول ما شافوا السكن الجديد…
وأنت كقارىء عمالة تحوش بين الأهالى والجيران
كله عايز ينوبه من الشقق مكان
يرتاح فيه بدل ما هو قاعد فى بيت متهان..
رواية اجتماعية حبيت حكايات الأهالى وعيشت معاهم وجعهم بصراحة الكاتبة وجبت فى الأحزان 🤦🏼♀️ ووصلتلك مشاعر الهم والحزن وقلة الحيلة (كولكشن من المعاناة 🤦🏼♀️) كمان بقيت تحس انك عاجز زي اغلب الشخصيات اللى فى الصفحات.. بحب الروايات اللى بتدخلك فى وسط الناس البسطاء تشوف حياتهم وعيشتهم وطريقة تفكيرهم… تقضى معاهم يوم كامل من أوله ( تشقى وتعانى معاهم وممكن برضه تفرح ما هو على قد البؤس اللى هتشوفه هتلاقى برضه لحظات حلوة بس انت دعبس عليها بين الصفحات وتبقى تطلعها بملقاط 😄
رواية بؤس وشقاء صحيح… بس حبيتها كتير تدروا ليش علشان هذا ذوقى 😁
#مكتبة_دنيا
#قراءات_٢٠٢٥