رواية ثلاثة غربان فوق حقل القمح – تأليف رويدا العباسي
الأسلوب والسرد
الرواية مكتوبة بأسلوب بسيط وسلس، مليان إحساس، وقريب جدًا من الخيال، وده اللي بيخلي الوصف دقيق في الحوارات. بتاخدك في عالم بين الحقيقة والخيال كوسيلة للهروب من الواقع.
القصة
بتحكي عن بنت أحادية السمع، عايشة في دوامة بين الواقع والخيال، وبتدور على طريقها بعد ما فقدت أغلى حد في حياتها.
الرسم والخيال بيكونوا مهربها الوحيد من الوحدة والصراعات اللي بتواجهها في المجتمع.
الفكرة والرسالة
العنوان "ثلاثة غربان فوق حقل القمح" بيرمز لحاجات كتير، زي:
الهروب من الواقع عن طريق الرسم والشغف.
الصراع النفسي والخوف من الفشل.
محاولة تلاقي الطريق اللي هيوصلها لحلمها اللي دفنته جواها.
العلاقات والشخصيات
البطلة بتتعرف على البطل عن طريق مكتبة أستاذ رفعت، وعلاقتهم بتبدأ تتطور من خلال الصداقة.
الرواية بتناقش الهجرة، الخوف من الجواز، وإزاي الواحد يدور على نفسه وسط كل التوهان ده.
البطلة بتحاول تستعيد حلمها في الرسم، بس خوفها من الفشل والرفض كان حاجز قدامها.
الإحساس والمشاعر
الرواية مليانة أحاسيس حزن، عزلة، حساسية مفرطة، وخوف من الفشل، لكنها في نفس الوقت بتخليك تفكر في أحلامك وطريقك.
في وسط ده كله، بيظهر رجل أقرب للملاك الحارس، بيحاول ينقذها، يسمعها، يشجعها، ويدفعها إنها تجرب حاجات جديدة بشغف.
النهاية
نهاية الرواية مش سعيدة، بالعكس، مؤلمة جدًا بس فيها عمق غريب.
ومن أغرب الحاجات إن الشخصيات ملهاش أسماء، البطل والبطلة طول الرواية غامضين، وده بيزود إحساس الغموض وبيخلي القارئ يحس إنه جزء من القصة.