رواية الناصرة
رواية ليست كما تبدو
الرواية بتبدأ بالبطلة بتاعتنا ليلى بتفوق تلاقي نفسها مربوطة في سرير من ايديها ورجليها في مكان غريب مش مفهوم ولا معروف فين وبتمر الأحداث لحد ما يتضح لينا وللبطلة أنه تم اختيارها علشان تكون عضوة جديدة في مجتمع الناصرة السري اللي بيهدف إلى صنع حياة أفضل لأعضائه .
في بداية الأمر هتكره الموقف اللي البطلة فيه هتكره المكان اللي هي مجبرة تفضل فيه لمدة ٣٠ يوم قبل ما يكون مسموح لها انها تخرج هتلاقي نفسك كاره لكل شيئ ولكل موقف ولكل دقيقة بتمر زيك زي البطلة تمام
بنكتشف أن الرواية مبتتمحورش حول البطلة وبس لأ
ده احنا بنشوف قصص لأشخاص تانيين أعضاء برضو في الناصرة وبنشوف الرابط اللي بينهم وبين البطلة بتاعتنا
يا ترا الأحداث هتروح بينا لفين وهنفهم ايه من المكان ده و ازاي المكان هو اللي اختار البطلة علشان تكون مجندة فيه ؟
الرواية كبيرة حوالي ٦٠٠ صفحة وأحداثها كتيرة ولكن دي مش نقطة ضعف ليها بالعكس مكنش ينفع تبقى اصغر من كده ولا أحداثها أقل من كده
بناء الشخصيات وتطويرها مظبوط جدا ملاحظتش فيه اي مشكلة نهائي السرد بتاع الرواية قوي جدا
الحوار ممتع وشيق هيخطفك من اول صفحة في الرواية لأخرها فا السرد والحوار ممتازين جدا
استخدام الكاتبة لأحداث حقيقية في الرواية كان مدروس ومتنفذ علي الشعرة من كتر ماهو دقيق
الرواية تقريباً فيها جميع انواع البلوت تويست اللي ذكرت في الأدب ودي نقطة قوة كبيرة جداً خصوصاً أن كل بلوت تويست بمصيبة شكل 😅
تعاطفت مع كل ابطال الرواية كلهم بلا استثناء ولكن كان التعاطف زيادة شويتين تلاتة مع ليلى البطلة ونينا الدكتورة
استمتعت جدا بالرواية من اول صفحة لأخر صفحة فيها وعندي أمل الكاتبة تكتب حاجة تانية بنفس القوة
وفي النهاية حابب اسأل هو فين حسين ؟ 💔
#مش_ريڤيو
#إسلام_بتاع_الكتب♥️