ميت مطلوب للشهادة ..

أقول ايه على عمل عظيم زي ده؟ مش هاعرف أوفيه حقه ..

من حيث المحتوى الكتاب يبدو انه عن الطب الشرعي.

لكن من حيث التنفيذ هو أكتر بكتير من كدة .. هي قصص انسانية في المقام الأول .. قصص منفصلة .. نمط القصص ان الكاتبة بتتناول قصة حياة البطل/البطلة بمشاعره وخبراته لغاية ما نشوف البطل/البطلة على لوح التشريح ونعرف منها ازاي بيقدر الطبيب الشرعي من خلال شكل وعلامات وجروح في الجثة يعرف طريقة موتها...ده نمط القصص.

لكن أبعاد القصص أبعد بكتير من كدة .. العمل مليئ بقصص انسانية وتحليلات نفسية وتجارب كتيرة اوي .. حتى العلاقة بين الجثة والطبيب الشرعي نفسها حوِّلِتها الكاتبة لعلاقة انسانية نبيلة ومليئة بالتعاطف والاحساس بالواجب.

من حيث اللغة بقى ده موضوع تاني .. لغتها عذبة جدا واسلوبها بينساب زي المية وانا باقراها .. حقيقي انا استمتعت جدا جدا بالعمل ده .. لَمَسِت قلبي حكايات الناس اللي فيها واستفدت كتير اوي من العلومات الطبية الموجودة .

شكرا جدا للكاتبة د.سمر عبد العظيم حقيقي عمل ممتع وانساني ومشرف.