ازاي اقرا المعلومات دي كلها وأكون مبسوطة بالشكل ده! ازاي كل ما اتخيل مشهد أو مكان الاقي على طول الصورة موجودة، توثق اللحظة وتدي الوصف التفصيلي ده حقه في الحياة؟
كل الصور كانت في مكانها مظبوط، في اللحظة اللي بنوصل فيها الاثارة فضول القارئ لأقصى درجة ف
هوب...
يلاقي الصورة طلعتله 😂
اما انطباعات ا. نهي عن باريس، ف دي حكاية تانية، فكرة تقديم كل مزار وكل مكان لينتهي الوصف بربطه بأحد الأمنيات، فكرة رقيقة لأبعد درجة،تلامس وجدان القارئ، تشعره انه مهما كانت الأحلام بعيدة أو مستحيلة ممكن تتحقق، ودي الحقيقة قناعة شخصية عندي، بتتأكد كل يوم لما اشوف حد قدر فعلا يحقق اللي اتمناه.
بالنسبة ل أكتر معلومة لفتت نظري، ف مش حبالغ لما أقول، اني انبهرت بكم المعلومات اللي قريتها، مش عارفة اتكلم عن أصل حكاية Phatom Of the Opera شبح الأوبرا،
ولا أصل معشوقة البنات Barbie واختها الكبيرة بليد لي لي، ولا قصة الحب المبتورة لنابيلون واوجيني، ولا قيمةوجمال لوحة فرح قانا الجليل
ولا الجداريات الأربعة لقوس النصر
اهي الجداريات دي، أكتر حاجة نفسي أقف قدامها واتأمل كل تفاصيلها لو سافرت باريس في يوم من الأيام...
ودي أحدي أمنياتي بالفعل
اما باقي الأمنيات...
بصراحة السؤال عنها، استفزني واستفز مخيلتي، لاني كنت فاكرة للحظة اني معنديش أمنيات، لكن بمجردما بدأت افكر لقيت انهم كتير، لكن يمكن من الوقت نسيتهم ونسيت اني ممكن أحققهم
أتمنى وأتمنى وأتمنى...
وبإذن الله تتحقق كل الأمنيات
وبشكر ا. نهي على العمل الهادي، الرايق الدسم ده، اللي أجمل مافي المسحة الإنسانية الرقيقة اللي غلفته من أول لآخر صفحة ❤️