اسم الكتاب :- ميت مطلوب للشهادة
التقييم :-⭐⭐⭐⭐⭐
تشخيص اي مرض بنسبة كبيرة بيعتمد على الحوار بين المريض والطبيب، مهما كترت التحاليل والاشعة لازم الطبيب هيسأل المريض عن الاعراض اللي بيحس بيها بالظبط والمريض يوصف والدكتور يسأل تاني والمريض يجاوب وهكذا لحد ما يوصل لاقرب تشخيص للمرض.
الفكرة هنا إن المريض ميت انقطعت صلته بالحياة مش هيعرف يتكلم ويقول هو حاسس بايه ولا يدافع عن نفسه لو مات مظلوم فهنا بيجي دور الطبيب الشرعي اللي انبهاري بيه مبيقلش ابدا لأنه مش بس دكتور لأ دة كوكتيل علوم بتتوظف كلها عشان الحقيقة تبان.
في الكتاب دة هنلاقي حكايات لموتى دار بينهم وبين الطبيب الشرعي حوار عن تفاصيل موتهم وايه اللي وصلهم أنهم يموتوا بالشكل دة وازاي الطبيب وصل لكدة وايه الدلالات اللي شافها في الميت عرفته كدة ودة الجزء المختلف في الكتاب دة عن الكتب اللي قريتها قبل كدة تخص الطب الشرعي، إن هنا بعد كل حكاية وكشف سر الموت الدكتورة هتشرح إيه الدلالات اللي شافتها واللي من خلالها استنتجت سبب الموت، وهنا المتعة كلها متعة التفاصيل الدقيقة وقوة الملاحظة اللي بتفرق فعلا في القضية كلها.
اقتباسات:-
💥 «كل شيء جزء من صورتك الشخصية؛ مذكراتك، تاريخك العلاجي كله يقبع في خصلة شعر، أظافرك، داخل معدتك، التكلسات على يديك تحكي أسرارك، تفضحك، أسنانك، نطقك للغة، التجاعيد حول عينيك وفمك… كل ما تفعله له أثر»
💥"اهم شيء في التواصل هو أن تستمع الى ما لم يقل"
واخيرا
استمتعت جدا بالكتاب و بلغة التواصل بين الميت والطبيب حسيتها جدا ولمستني و اتمنى يكون في جزء تاني وحكايات اكتر ❤️❤️