🔹️أول حاجه شدتني للكتاب الغلاف ، الإسم خلى الفضول عتدي عالي ، وبرج إيفيل وسط بلورة سحرية ياسلام يا سلام أكيد في عالم سحر وخيال جوا ، لازم أقرأه اكيد ، وقد كان ..

🔹️ إنك تكتب في أدب الرحلات دا شئ صعب فإنت لازم تجذب القارئ وتبهره طول ماهو ماشي معاك ، لازم يبقى في تفاصيل كأنه خد شنته وسافر معاك ، لازم يستفيد وبعد ما يخلص رحلته يطلع شخص تاني بثقافة وفكر تاني ، والكتاب ده خلاني حسيت كل ده وأكتر ...

🔹️ أنا مش من محبي التاريخ بس هنا خدت جرعة تاريخية ممزوجه بالسعادة عرفت حاجات كتير جدا مكنتش أعرفها بداية من تاريخ المسلة المصرية اللي في ميدان الكونكورد ، أم كلثوم والحفلة اللي عملتها عشان مصر ، تاريخ الموناليزا وجولتي فالمعرض خلتني كأني هناك حرفياً وبتفرج معاهم على كل تفصيلة ، كمان الحبب لقلبي الجزء المتعلق بالقضية ال / ف / ل / س / ط/ي /ن/ي /ه وكل كلمة عنها وادتني حب للكتاب اكتر ...

🔹️ أمنيات الكاتبة كانوا خمسة اتفقت معاها في أمنيتين ، الأولى إني أعيش يوم أسطوري مع حبيبي يوم لاينسى لعله يكون قريب في أطهر بقاع الأرض مكة بعمرة تذيب القلب وتطهر الروح ...

الأمنية الثانية إني أفضل قادرة على الأحلام والتخطيط والرسم ماحييت دي أمنية صعبة أرجو ان تستمر معي ومعكم ...

🔹️ أمنياتي من الصغر كانت تتلخص في إني أدخل صيدلة وحققتها بفضل الله ، أكون مميزة في شغلي وشاطرة وقد كان ، أعمل بيت صغير وأسرة سعيده وبحاول وبعافر ربما يديمهم نعمه ، أسافر للعمرة ع أسرتي وأسافر تركيا ربما يتحققوا يوماً ما ، والأمنية والرجاء الأكبر ان يحسن الله خاتمتي ولا يفتني في ديني ...

🔹️ الكتاب ده كان قرائتي الأولى لنهى عوده وحابة أشكرها عالمشاعر اللي شاركتها والأحاسيس الحلوة اللي وصلتهالي ، والأحلام اللي خلتني أرسمها ومفثدش الأمل في تحقيقها ، وعن التاريخ والحب والأمل اللي خلتهم جزء واحد في بلورة سحرية تجذبك من البداية للنهاية ...

🔹️ وكلي أمل أقرأ الجزئين الثانين قريباً ، وفي إنتظار جزء رابع مميز كما كان الثالث ..

#بلورة_الأمنيات_مع_نهى_عودة 🤍 #مسابقة_عن_العشق_والسفر_3 ✨