⭐⭐⭐⭐

بتبدأ احداث الرواية في المهرجان السينمائي، واثناء ما الفنانات بيتصوروا علي السجادة الحمراء والكل مشغول في التصوير، بيلاحظ فاروق أحد المصورين ان فستان الفنانة أنجي ديله الي علي الارض شارب لون احمر قاني وكل ما تمشي ترسم خط احمر مخضب علي السجادة.. طبعا بيستغرب جدا ويقرر انه يتتبع اثر البقعة دي لحد ما يوصل لمصدرها.. بيعمل كدا فعلا والاثر بيقوده لباب احد غرف المكان والي بيكتشف انه غرفة أنجي الممثلة، عشان يتفاجأ بجثة اسفل المنضدة والدماء مغرفة الارض!!!

⚠️تصلح الرواية لمن هم 18+ ⚠️

لغة العمل عربية فصحي سردا وحوارا..

وطبعا واضح تطور لغة الكاتبة عن الاعمال السابقة..

السرد كان له خطين.. خط احنا فيه دلوقتي.. وخط بيورينا بعض لمحات من ماضي بعض الشخصيات او حتي ماضي قريب.. و الي هو قبل الجريمة ما تحدث بوقت بسيط

ودا بيكون لظهور او إلقاء ضوء علي شيء معين

وصف المكان في العمل كان قليل بعض الشيء او حسيت انه كان محتاج رسم اكتر.. لكن قصاد وصف الشخصيات كشكل.. يمكن دا عوض نقص وصف المكان.. لأن وصف ملامح الشخصيات هنا مجسم بطريقة ممتازة وانا بحب كدا اووي

ف يا سلام لو كان المكان كمان كدااا😅♥️

وبالكلام علي الشخصيات نروح لشخصيات العمل الي كانت كتيرة بعض الشيء.. والكاتبة عملت حاجة انا اول مرة اشوفها وهي انها في الاول وقبل الدخول في العمل.. كتبت جميع شخصيات العمل بالاسماء والوظيفة الدرامية او الدور الي قايم به الشخصية.. حاجة غريبة شوية بالنسبة لي المهم.. الكاتبة نهي داود تميزت بأدب الجريمة ((الاجتماعية)) ودا بيخلي شخصيات العمل لها دوافع و تبريرات وخلفيات تاريخية فوق الممتازة بشوية.. يعني مثلا شخصية نزار (المحقق) اشتغلت عليه كويس اوي في حتة البناء التاريخي

(شاكر) الي هو المجني عليه ذات نفسه له بناء تاريخي عظيم.. بيخدم الحدث الناري الي هو ليه الراجل دا اتقتل؟

ومش دول بس جميع الشخصيات تم تصميمها بحيث تخدم حبكة العمل بشكل احترافي وكمان وصف شكلي مميز جدا يخليك تشوف الشخصية قدامك.. حتي كان في شخصية بتاعني من عدم ثقة في ذاتها وبتعمل حركات متوترة وغريبة.. الكاتبة كانت ممتازة في نقل دا كويس

طب احنا بنقرأ عمل جريمة.. ف هل تم بقا تشويق و تشكيك في كل الشخصيات وكدا لحد النهاية؟

طبعا دا سؤال مهم..

حابب اقولك يا عزيزي انك هتتسحل في التحقيقات الي كل ما تتقدم تتعقد اكتر.. وتشك في الناس اكتر.. ودايرة المشتبه بهم بدل ما تصغر بتوسع.. لحد كشف المستور ومعرفة القاتل.. الي صعب تتوقعه بسبب أن الكاتبة ماسكة خيوط العمل كويس بدون ثغرات

للاسف التلت الاول من العمل كان رتمه بطئ فسبب بعض الملل بسبب ان الموضوع كان ماشي تحقيقات مع الشخصيات بدون اي مشاهد حماسية.

بس زي ما بقول دا في التلت الاول.. بعد كدا الموضوع اختلف

عشان دخل لمحات مهمة من الماضي، وكشف علاقات مهمة للشخصيات

ممكن اقول ان الحوار كان كثيف اوووي

بس دي طبيعة نوع العمل ف يغفر له😅♥️

بالإضافة ان الحوار كان مهم وبيدفع الحدث لقدام و مشوق في معظم الأحيان

النهاية كانت.. منطقية، خالية من الثغرات وتحترم عقلية القارئ

الخلاصة عمل ممتاز جريمة داخل قالب اجتماعي بشخصيات مهمة لها دوافع و مبررات بحكبة متماسكة ونهاية غير متوقعة♥️