❞ أنا ضاعت منّي قصايد في مراية الحمّام
وقصايد في الأوتوبيس
وقصايد في دموعي اللي اتمسحت بالأكمام
وقصايد ما بتعجبش الأصحاب
وصبحت مع الأعوام
باكتب شِعر سراب
باكتب شِعر تراب
بطّلت الشِّعر كلام
بطّلته قوافي
باكتب شِعر القَدَم الحافي
على رملة بحر الأوهام
باكتب شعر منافي
الماضي نفاني لقدام
أنا منفي مع الأيام
والشعر اتنفى ويّايا
وانا قاعد ويّاه
باكله وباشربه واتنفّس بيه
واللي بيفضل منّه
باخده في حضني وانام ❝
⭐️⭐️
❞ عايزِك تقولي بجد
أنا أصلي مش متأكد
هوّ احنا كُنّا سوا؟
أنا في الهوا ماشي
بعيد عن الأرض بمسافة سبعة امتار
وبعيد عن الدنيا بسبعة امتار
وبعيد عن الآخرة بسبعة امتار
ماشي بدموعي وحالتي ما تطمّنش
لكن باحوم ع العِشّ
مستنّي منِّك إجابة
بعيد عنِّك
أنا ما باعيشش! ❝
⭐️⭐️
❞ كدّاب اللي يقول لك ورد النيل
كدّاب اللي يقول لك مات قنديل
وانّ الحب قليل
وانّ القبح جميل
وانّ ميزان الدنيا يميل
ويطبّب أحزانك
كل ده كدب في كدب
الناس قدّامك
❞ ماشية وفاردة ضهورها
جايّة بزهدها وفجورها
من أيامها لأيامك
للأيام الجاية
يعني سواقي الأرض
يعني الترس يسلّم ترس
يعني الأيام بتورّث بعض
والإنسان الإرث
يعني اللي بيجري ورا القرش
يعني اللي بيحزن ويهزّر
وبيسهر في الأزهَر
ويبسمل ويبخّر
ويزور الأوليَّا
يعني القلب الأخضر
يعني سمار الوشّ ❝
⭐️⭐️
❞ بيكلّمها في سره
بيكلمها في سرهم
والكلام بيجرهم
من مكان لمكان
في شوارع مش موجودة
يمشوا ولا يهمهم
الوهم بيضمهم
وعشهم كتمان
والكلام ما بيخلصش
يرسم لهم شمس
تحمّر وشّهم
وتعرقهم
يقلعوا بلوفراتهم
يرسم لهم شجر وضلّة وبرتقان
حكايتهم حاجة عادية
هيّ جميلة
وهوّ حنيّن
كان ماشي في حالُه
بيفكّر في الحالة
هىّ اللي قالت له تعالى
أوّل ما اتكلّم
احلوّت أكتر
إدّت له الضوء الأخضر
وفضل يحكي لها
تضحك وتكركع
تسرح وتدمّع
إيده مسكت إيدها
شفايفهم قابلت بعضيها
اتشبكت روحه في روحها
بس الشجرة اللي مادة فروعها
واللي رسمها كلامه في دنيا سعيدة
مالت على كتفه وقالت له خلاص
الهوا تنهيدة
روحك راح تبقى وحيدة
بقى مش عارف يعمل إيه
عايز إيدها
وإيدها بعيدة
بقى ماشي يكلمها في سره
وكلامه مش بيونسها
ولا يلمسها
لسّه عايزها
قصيدة جديدة ❝