لما عرفت ان الكتاب قد يقع تحت تصنيف مساعدة الذات او الـSelf Help دخلت وانا متهوهوشة وحاسة اني عند اول كلام عليوي من بتاع التنمية البشرية هرمي الكتاب من الشباك وعوضي علي الله في الفلوس الي دفعتها لأن لا سني ولا مرارتي يسمحوا بذلك، لكن الحق يقال الكتاب غير كده تماماً

الحقيقة في رأيي المتواضع الكتاب اقل ما يقال عليه ان بيكشف العاهات والتقاليد والبلاوي النفسية الي كلنا بناعني منها، في اول جزء من الكتاب انا كسارة اتكدرت لأن الكتاب كل شوية يناولني في وشي بالوكامية من كمية المرار الطافح الي في شخصيتي الي حطني قدامه ولقيت لسان حالي بيقول "خلاص اختصر قولي اني شمبانزي واخلص" علي رأي محمد صبحي في مسرحية وجة نظر.. من اول عيوب قاتلة في شخصية الي العاب نفسية بنلعبها مع نفسنا ومع اقرب الناس لينا..

انا قلت مبدهاش بقي لو الضاكتور الفاضل بلاني بنعمة معرفة عاهاتي وسابني ومشي من غير ما يدينا حل كان وزع امواس نقطع بيها شرايينا مع الكتاب، لكن الحمد لله معملش كده هو كمان موزعش حل ده عمل الي انقح من كده..

الجزء الاخراني من الكتاب كلها عبارة عن تدريبات بتشجعك علي انك انت الي تلاقي حل لمشاكلك بنفسك لا وايه وكمان متعملش كده لوحدك بطريقة في منتهي الصياعة الضاكتور الفاضل خد بأيدي واداني امثلة ووراني اني مش لوحدي الي في القاع ده في معايا ناس كتير مما شجعني بشدة اني اكتب انا كمان واتصدمت في افكاري من كمية الدرر والهراء الي كانوا محشورين في زوري..

اما صحيح التعاسة تحب الرفقاء..

حقيقي انا بشجع الكل يقراه بس بنوه انك مينفعش تاخده طاخ ان كده، اقراه بتاني ادي لنفسك فرصة انك تفهم وتحس وتكتب وتشتغل معاه هتلاقي بلاوي بتنزل عليك وبتقول في هلع معقولة انا بعمل كده..

الكتاب كمان طلعت منه بكم لا بأس بيه من المفاهيم النفسية الي انا ناوية بمنتهي الجدية اقرا عنها أكتر لأني حاساها ليها علاقة بي جدا وبالفعل عملت كده وجالي هلع من كمية المعلومات المفيدة، لذلك بشجع الكل ان الحاجات والنظريات النفسية الي مكتوبة وانت تحسها شبهك وقريبة ليك خد بيها نوت لأنك هتحب تقرا عنها اكتر..

كتاب من كتر جموديته خلاني بقلب جامد انزل وبمنتهي الاريحية اشتري الكتابين التانين للضاكتور واقراهم واضحي بقي بالنص الباقي من مخي بعد ما النص الاولاني ضرب..

لذلك سو_ريفيو لكتاب #لأ_بطعم_الفلامنكو 5\5