❞ أنا الأرض 🌎 وأنا الوطن ، أنا شجرة الزيتون 🕊️ المباركة لا شرقية ولا غربية، جاء ذكري في القرآن الكريم فكرمني، لذا فأنا رمز السلام على هذه الأرض، سيظل السلام موجودًا طالما أظلل عليه بغصوني. ❝
حكاية شجرة على لسانها بتبدى القصة
ظلها يشهد على مليون حكاية و حكاية
لمة عيلة بياكلوا أحلى غدوة 🍱
اتنين على الحب والود اتعهدوا
أطفال بريئة بيلعبوا نطيطة
وكورة تتشاط تيجى فى الأغصان
تزعل الشجرة شوية وتنسى حزنها لما تشوف ضحكتهم فى وشوشهم باينة
وتشهد تانى على مآسى ودماء على الأرض سايلة
شهيد يرتقى
ولسه واحد تانى هيفارق
ويجى مكانهم تالت وعاشر
تشهد على دبابات واخدة فى سكتها الأغصان
تشهد على بيوت فارقها الأصحاب
وكمان على قدوم أهل ياسين اللى كانوا فاكرين
أنها بداية جديدة ليهم بعد فراق الغاليين
فى قرية دير ياسين هنقابل عائلات كتير منهم الأصيل وللاسف منهم الخاين للغير
فيهم اللى موافقش يسلم ويعيش مع الظالم والمحتل وفيهم اللى ممشى حاله علشان أعماله
بس ازاى أعيش جنب اللعين اللى سارق أرضى ومبلطج فيه وشايف أن من حقه يختار أى بيت
يدخل فيه ويجيب عاليه واطيه وانتهاكات من كل نوع لا فارق معاهم سن من نوع
عرب ولازم يُبادوا
مش مهم أنهم على حق
ده من وجهة نظرهم أنهم هما اللى أصحاب الأرض…
الرواية مليئة بالأحداث …
لكن عندى شوية ملاحظات 📝
📌 الرواية كحدوتة تشد وتبقى عايز تعرف مصير ياسين وأهله وحكايتهم لكن كرواية بتتكلم عن فلسطين نفسها ومعاناتهم حسيتها بس فى مقاطع ومقاطع يعنى حسيتها متركبة على الأحداث
📌 علاقة ياسين بـالفتاة اليهو****دية ما تقبلتهاش ولا تقبلت تطور الأحداث بينهم مش عارفة 🤷♀️ ده بيحصل فى الحقيقة ولا لأ بس احساسى أن صعب يكون فيه ارتباط وحب يجمع ما بينهم وخاصة علاقة من النوع اللى فى الرواية
📌 حكاية " عايدة " اتسابت مفتوحة لتخيلتنا كنت أتمنى يبقى فيه مبرر للى حصلها من زوجها وأهله….
📌 وأخيراااا " مذبحة دير ياسين " ما اخدتش حجمها من الرواية كان يفضل لو اخدت مساحة أكبر خاصة أن الرواية مبنية على القرية…
فى الآخر الرواية أسلوبها حلو ومؤثر ومؤلم لو قاريتها بنية أنها رواية لا تمت للواقع الفلسطينى أو أى أحداث فلسطينية سابقة استمتع بها كرواية وحدوتة 💙
#مكتبة_دنيا
#قراءات_٢٠٢٣