بداية احداث الرواية بتكون مع طفو الشاب (التؤام الملتصق) شاب من أسرة متوسطة او متأجرحة كما أطلق عليه راوي العمل (لان العمل في الاساس بيتحكي من راوي سمع او عرف عن الجزيرة دي جزيرة التؤام الملتصقة و نقل الاحداث ) بالاضافة ان الأسرة دي متدنية ورب الاسرة بيكون هو زي قس الكنيسة بتاعت الجزيرة.. وهذا الشاب طفو عنده محل لبيع السكر المسكر كما أطلق عليه الرواي برده 😅 وهو عامتا الرواية فيها حاجات غريبة كتير بالقصد من الكاتب و دا من إيجابياتها، و في يوم بيجي كهل لطفو و يسيب معاه امانة عبارة عن جوال او شوال خيش... و من هنا بتبدء الاحداث في ان طفو بيجبره فضوله علي فتح الشوال و بيخوض رحلة في كشف الشيء الغريب الي جواه

شيء تشده يشد، تمطه يمط، تتركه يعود كما كان🤔

(العمل يصلح لمن هم فوق ١٥ سنة)

طبعا واضح من النبذة أن الرواية غريبة و دا شيء طبيعي لانها بتدور في عالم خيالي، له قوانين و معتقدات مختلفة تماماً عن عالمنا

وانا للاسف دخلت الرواية معلي سقف توقعاتي..

لغة العمل كانت جميلة بسيطة مش معقدة و العمل دا اصلا لو كان اتكتب بلغة معقدة كان هيبقي صعب و مش راكب علي الاحداث.

الحوار كان فصحي.. وحوار الرواية دي غير اي حوار ممكن تقرأه في اي رواية

حوار له طابع غريب و دا عجبني عشان كان عامل طريقة خاصة بشعب غريب في جزيرة خيالية.

السرد زي ما قلت كان من منظور الشخص الأول.. راوي خارجي، و كان سلس و معنديش معاه مشكلة

المشكلة تكمن في ضعف او قلة الوصف.. انا داخل عمل في عالم فنتازي مش موجود علي ارض الواقع ف كنت محتاج وصف دقيق و عميق اكتر من كدا و دا عيب قاتل في الرواية بالنسبة ليا

و اه العمل يصنف فانتازيا بس من نوع تاني غير الحروب و العوالم بتاعت جورج ر ر مارتين

شيء مهم في العمل برده لازم أقوله وهو ان العمل في إسقاطات و رمزيات كتير في منها الي كان واضح والي كان عميق بالذات الفصل الثاني بتاع ولي العهد كان ملئ بالرمزيات الي فعلا عجبتني و سبب النجمتين دول اصلا

من الحاجات الي حبتها برده معتقدات الشعب (الحرام و الحلال) قوانين مختلفة و دي اكتر حاجة بتعجبني في العوالم المخنلفة وهي وضع قوانين خاصة به، بس للاسف لم تستخدم في صالح العمل بشكل كويس

ادخل بقا في الجوانب الي خلت الرواية كانت عجباني في الاول و بعد كدا كرهتني فيها...

زي ما قلت انا كنت متحمس و انا بادئ في الرواية بس بعد ٥٠٪ بدأت اقول و بعدين الاحداث مملة ممل رهيب رتم بطئ، و راكد مفيش إنطلاقة لقدام

دا غير ان الكاتب فتح خط (الي هو الفصل الاول) و معرفناش مصيره

و الفصل التاني يغفر له رمزياته

و التالت كان أفضلهم من حيث تسلسل الاحداث و هو الي فهمنا الشيء الغريب الي وصفته في الاول جه منين

لكن برده الرواية خلصت من غير ما نعرف الجسم دا و لا مصدره يمكن بيرمز لشيء الله اعلم

للاسف كنت متوقع عمل اقوي من كدا، مش معني انك حاطط رمزيات حلوة انك تبوظ احداث العمل و تخليه ممل و بلا هدف

طب ونبي الي قرأ العمل يقولي ايه الي كان هيحصل لو الشعب كان ناس عادية مش تؤام ملتصق.. ولا حاجة

الكاتب فعلا بني عالم حلو بس معرفش يستخدمه صح في صالح العمل.

بيت المساكين من وجة نظري هي الافضل و حبتها جدااا