في بعض الأعمال الي بيكون صعب يتعمل لها ملخص او مراجعة.. بتكون صعبة الشرح ولازم عشان تفهم العالم الخاص بها تقرأها علطول.

و لعبة البيت تعتبر واحدة من هذا النوع.

بتبدأ احداث القصة.. بالعمة ليلي، الي بتحبس بنت أخوها ماتيلدا في سجن.. ولكنه سجن بداخل حوائط البيت بطريقة او بأخرى..

طب ايه سبب فعلتها دي، وهي انها عايزة بنت أخوها تكتب عمل روائي في خلال خمس أيام عشان تسترجع حريتها و تطلع من السجن دا.

دي نبذة مخلة عن العمل و هي مش بالسطحية الي ممكن تتخيلوها بل الموضوع اعمق من كدا بكتير⚠️

العمل دا بسيط في احداثه بمعني انه مش معقد او مش مفهوم.. إطلاقاً، ولكنه دسم

عمل أدبي يحمل نص قوي حقيقي مش مجرد كلام..

و عشان تفهموا قصدي اكتر ندخل في ((اللغة))، لغة العمل من اقوي بل هي أقوي فعلا جانب في الرواية، من فترة لم أقرأ لغة محكمة بالشكل دا و مواكبة احداث العمل بكل انسيابية و سهولة..

حبيت اللغة جداااا♥️♥️😍

وصف المكان كان جيد و وصف المشاعر كان فوق الممتاز، أحداث القصة كانت بتروي من منظور الشخص الأول للبطلة ليلي (العمة) و كان في بعض الجوانب المهمة جدا ولازم تظهر علي هيئة مشاعر و دا كان موفق زي ما قلت 👌

شخصيات العمل قليلة، و مركزة جدااا

احنا قصتنا بتتمحور في بيت و أسرة صغيرة..

و طبعا رسم الشخصيات كان كويس جداا و لو كان وحش كان العمل باظ

لان ببساطة العمل بيتعمق داخل نفوس الشخصيات و بندخل في ناحية الأمراض النفسية و العقد الحياتية و تأثير فترة الطفولة علي حياة الإنسان كلها..

تسلسل الاحداث في العمل كان ممتاز و سلس

الخلاصة عمل بطله هو اللغة، و بالطبع الي ساعد علي اكتمال اللوحة تصميم جيد للشخصيات و تعمق بداخلهم مع فكرة جيدة.. و أعيب شوية علي النهاية بالرغم انها مناسبة للأحداث.