من وقت للتانى بتبقى محتاج لكتاب 📕 يديك أمان مش مهم تكون مقتنع المهم أنك تشحن 🔌بطاريتك 🪫 المتعضعضة

كلام اللى حوالك بقى بالى ومش سارى 🤫

على أساس أنك عارف اللى فيها

زى مثال اللى بيته من جلاس 😄

فتلجأ لكتاب يطبطب ويهون ويقولك اتقدم

هتتشجع وتتحمس

وتحس نفسك هنيدى فى وش إجرام 💪🏻

لما دهن جسمه زيت قلى 🧴وطلع يتخانق وعمل فيها شجاع استمد القوة من زيت القلية😄

اهو ده اللى بيحصل معانا بنستمد الباور من الصفحات📑

لعل وعسى تغير اللى فى الدماغ 🤔وتشيل التراب

عن السلوك وتشحنها بنسبة معقولة علشان تقوم..

وده اللى حصل معايا لما قاريت كتاب 📕 تبدأ الحياة خارج منطقة راحتك

كنت فاكرة أن الراحة فى منطقتى منطقة الأمان 🤗

وحقيقى من وقت للتانى يستحسن تدخل فى قوقعتك 🐢وتشوف راحتك

بس براها مش شرير 😈قوى زى ما متخيلين خاصة لو بتختار أنت المناطق اللى تخرج فيها من قوقعتك

أيا كان صحبة، شغلانة ، هواية

أكيد أيامنا مش كلها ألطف حاجة بس الحلو أنك تاخد منها اللى يناسبك وماتسودهاش على نفسك

افهم شخصيتك واحترمها وقدرها

لو أنت شخصية بتحب العزلة ده مش معناه أنك شخص مكتئب ومش بتحب الناس لكن أنت كده مرتاح واحنا هنحترم راحتك وهنديك مساحتك بس ممكن تستمتع بعزلتك بهواياتك وخروجات تسعدك

وصحبة برضه تفهمك وكله من غير ضغط أنت رجلك كده كده هتتجر لما تلاقى نفسك اندمجت

الكتاب 📕 اتكلم عن حاجات كتير عن عادات بتعملها من أول ما بتصحى من نومك 🥱لحد ما تنام على روحك 😴وتلاقى يومك انتهى وأنت يا ولداه ما طلعتش منه بشىء جديد🤷‍♀️

حاجات بتضيع يومنا وتغنينا عن الناس اللى برا

وتشغلنا عن أداء يومياتنا وبتخلينا نستغنى عن التجمعات وطبعا عارفين مين المخرب اياه 😉

اللى بياكل يومك ويحسسك أن العالم 🗺️ مليان وحوش هو مليان طبعا مش هننكر بس الحل مش فى الاستسلام والعزلة وأنك تتقوقع وتدخل منطقة راحتك وتقول كده أامن

روحت مكان غلط ومطلعش مناسب مع شخصيتك

مفيش مانع تجرب مكان تانى وتالت هتظبط معاك فى يوم والله

وهكذا فى العلاقات … علاقة تروح وعلاقة تيجى

بس مش كله هيطلع مضروب إلا أنت بقى اللى موكوس هتظبط معاك فى واحد او اتنين ويجروك معاهم للى يناسبك أكيد

وهكذا وهكذا

أنا شخصيا استفدت منه بالرغم أنى ماليش فى النوع ده من الكتب مش شرط تنفذه بحذافيره ومش شرط برضه كل اللى فيه تقتنع به بس الأكيد أن فيه حاجات هتعلق معاك

و هتلاقيك وأنت بتقرأها لمست معاك ومشيت على هواك وبدأت تطبقها تصدق طلعت حلوة وسهلة

وفى الاخر مش هقولك كسر قوقعتك واخرج منها لأنك هترجعلها هترجعلها 😜 هترجعلها لما تحتاج لها شوية فصلان لأننا مش هننكر برضه اهميتها لكل إنسان وتريح دماغ بس مايبقاش دايما ده الحال عايش فيها وفايتك حاجات كتير ممكن تبقى برضه ليكى تغيير ومنطقة راحة وأمان جديدة 💙

تعليق صغير : وجب التنويه أن فى جزء فى الكتاب عصلج معايا شويتين😁 حسيته مكتوب بشكل علمى شوية مختلفة عن الاجواء العامة للكتاب هو جزء مش كبير فمتخلهوش ييأسك ويقلل من حماسك أنك تتقدم فى الكتاب لأن اللى باقى كله كلام مشجع 📣 وفى اللطيف 😁💙

#مكتبة_دنيا

#قراءات_٢٠٢٣