ما هذه التحفة الفنية التي وقعت في يدي ، انا وقعت في غرام هذا الكتاب حرفيا .

كنت في مود وحش جدا والكتاب ده قدر بخرجني من المود الوحش بجدارة ، انا عندي مشكلة مع القصص القصيرة والمجموعات القصصية بحس بخنقة وانا بقرأ ، لكن مني رضوان الرائعة قدرت تشيل الخنقة وتخليني عايزة اقرأ اعمال اكتر من القصص القصيرة

القصص بجد كانت جميلة اوي ومريحة بتذكر في القصة مشروب قهوة وكمان فيلم وكمان اغنية ، اسم كل قصة من القصص هو اسم اغنية علي سبيل المثال :- أسمر ملك روحي والقصة دي قدرت تخلق جوه دماغي بجد كافيه ابو الريش وجماله وقد ايه كان معظم الفنانين بييجوا يقعدوا فيه لاني كمان بحب الحقبة الزمنية دي جدا ، اسأل روحك وبجد القصة دي كانت مؤلمة بس تخليك تضحك في الاخر اللي هو هم يضحك ، وقصة صورة اللي كانت بتجسد قضية حلوة اوي وكمان فكرة حلوة ، وأحن الي خبز امي ودي كانت قصة ريحة العيش باينة وانت بتقرأها بجد ، الساعة بتاعت قبل النوم كانت من القصص الجميلة ، وميستهلوشي وبجد بطلة القصة دي قالت اللي كنت محتاجة أقوله بالظبط ورمضان جانا وكفاية قصة المغامرون الخمسة دي كانت مفاجأة بالنسبة ليا والكاتبة خلقت قصة جميلة اوي من هذه السلسلة الممتعه والشيقه وغيرها وغيرها من القصص ، لمس قلبي الجزء اللي الكاتبة اتكلمت فيه عن وحدتها وافتقادها لوالدها في قصة يا مصطفي يا مصطفي ، وكمان حنينها واشتياقها للمعادي بتاعت زمان وتحس كده بالنوستالجيا وانت بتقرأ .

كانت في قصص بتطرق لمواضيع حساسة اوي وصادمة بس اسلوب الكاتبة العذب السلسل الرقيق بيخليك تتعمق أكثر وأكثر وتحب تكمل وانت كده كانك بتاكل كلام وطعمه حلو اوي .

بجد شكرا شكرا للكاتبة لاني مستمتعتش بكتاب بقالي كتييير واقدر أقول إن ده بقي كتابي المفضل خلاص .

اه انا كتبت الريفيو باللغة العامية لسبب واحد وهي سلاسة قلم الكاتب بأنها كتبت نص الكتاب باللغة العامية بس اللغة العامية المليئة بالجمال والرقي .