مينا عادل قرر إنه ياخدنا في رحلة الى عالم الأقباط ودواخل حياتهم الخاصة بيهم من خلال مجموعة قصص قصيرة جدا جدا، يمكن تكون مواقف أكتر منها قصص، وجزء من براعة الكاتب إنه في سطرين تلاتة بيكون رسم الصورة كاملة للحكاية اللي هيحكيها في صفحتين تلاتة برضة، كل ده بيعمل منه قصة كاملة ببداية ونهاية ورسالة، لا ومش مرة واحدة لا دا مالي كتاب كامل من الميكس الصعب ده!
القصص بتعرف الواحد حاجات كتير عن تداخل الدين المسيحي في الحياة الاجتماعية للأقباط، وعلاقتهم برموز وخدام الدين، وعلاقاتهم ببعض وبالمسلمين.
القصص متنوعة بس أغلبها ساخر، وفي بعض الأحيان هزلية مضحكة، وفي أحيان أخرى محزنة ومخزية...
قرأته ضمن تحدي 'أبجد' للقراءة
محمد متولي