⭐⭐⭐⭐
هل انت مُضحَ ام ضحية🤔
طب هل اصلا التضحية دي شيء نبيل، ولا بيتوقف علي الشخص الي انت ضحيت عشانه؟!
بندخل في بداية العمل بمشهد قوي، زوج يصحي يلاقي مراته و ابنه مقتولين.. بل و المفاجأة ان هو القاتل!
بس هل يا تري هو قاتلهم عن عمد و وعي ولا في منظور آخر للاحداث، و ايه علاقة الظابط عمر (صديق الزوج) بالجريمة دي.. وهل الصحفية هيلين هتقدر تحل لغز القضية دي هي وصديقها أنس 🤔
طب ايه بقا علاقة كتاب الاسقاط النجمي الي كان موجود في مسرح الجريمة بكل دا 🤯
أسئلة و خطوط كتير هتعرفها بقراءة العمل الممتع دا و ندخل في صلب المراجعة 👇
حقيقي الكاتب محمد حياه عمري ما قررت أقرأ له و خذلني هو فعلا كاتب شاطر و بيعرف ازاي يبني عمل مشوق و بالذات جزئية الالغاز دي هو فنان فيها
اللغة كانت عربية فصحي كويسة جدا فيها تطور نسبي عن الاعمال السابقة للعمل دا، و سلسة بدون تعقيدات تفصلك عن أجواء الرواية
و الحوار أيضا جاء عربي فصحي
السرد و الوصف ممتازين، العمل دا في مشاهد خوارقية و عوالم مختلفة و هكذا، ف قوة الوصف كانت مطلوبة جدا عشان نعيش في الأجواء الغامضة
شخصيات العمل من اهم جوانبه.. تصميمها كان من ممتاز لجيد جدا، ف عندنا الضابط عمر و أنس الصحفي العاشقين لهيلين.. و دا بيخلق جو من التصارع بينهم لاظهار من اقوي في حبه لها و طبعا حالة كراهية شديدة بينهم
زائد عم أمين و شقيقة هيلين و زوجها ياسر و غيرها من الشخصيات الي كان لها دور جيد و محرك هام جدااااا للاحداث و النهاية.. الي كانت كذا نهاية داخلين في بعض حرفياً..🤨🤨
يحتوي العمل كعادة الكاتب علي لغز بيتحل واحدة واحدة علي مدار العمل.. و مش حابب اتكلم عنه عشان خايف احرق
عجبني جدا استخدام تيمة الاسقاط النجمي و العالم(( الميتافيزيقي)) في احداث الرواية و حبكتها، مع ربطها بأسم العمل هما فعلا ٧ مراحل هتمر بيهم و ساعتها ممكن.. تصبح قاتلاً
نهاية العمل او نهايات العمل😅
كانت جميلة و فيها مفاجات
و انا اقصد بان في كذا نهاية هنا يا جماعة
ان الكاتب عمل حوالي ٣ نهايات جوا بعض كل واحدة منهم (راكبة) علي احداث العمل و مكملة الاتنين التانيين و دا شيء عبقري طبعا♥️♥️
من الحاجات الي ممكن اعلق عليها هي تغيير علاقة عمر و أنس المفاجأة الي كانت بدون اي ترتيبات او تمهيد جيد.. بصراحة متتبلعش 😅
حاجة تاني هو مش عيب بس حسيت في بعض الاجزاء من العمل اثناء القراءة باجواء من رواية الفيل الازرق.. مقصدش اتهام الكاتب بالتقليد لا طبعا
هو بس تشابه أجواء 👌
الخلاصة عمل جميل، مشوق، هيملئ شغفك كقارئ بيحب جو الحريمة الغربية الي مع أجواء خارقة و الغاز بنهايات ملطوية.