"ضي يونس"

كنت قرأت من فترة طويلة نسبيًا رواية تعاويذ عمران لدكتورة نرمين، وأذكر من خلال الريڤيو اللي نزلته بعدها إني كنت مبهورة بيها، ودلوقتي؛ وبعد ما قرأت ضي يونس.. أنا بجدد انبهاري بقلم دكتورة نرمين..

الرواية بدأت برومانسية عفيفة تخللها بعد التجاوزات - غير الخادشة للحياء - وبعدين دخلتنا في إطار فانتازي لذيذ، لحد ما وصلت لرحلات وأحداث تاريخية عمري ما حسيت بالمتعة دي وأنا بقرأها غير في عمل تاريخي وحيد كان اسمه الأمير الأحمر، وحقيقي أنا مبسوطة بالدمج المبهر ده في الأحداث..

السرد كان بلسان ضي ويونس طول الوقت، وكان محسسني بكل مشاعرهم، الأحداث كانت ماشية بسلاسة والحبكة كانت متقنة لفكرة مميزة، حتى الشخصيات كانت مدروسة حلو، والنهاية كانت دافية أوي..

يمكن بس مكنتش مقتنعة إن الحوار يكون بالفصحى وكنت حاساه محتاج يكون عامي لأني كنت حابة أعيش اللحظة وقت كلام الأبطال بالمصري ووقت كلامهم بالفلسطيني وأحس بالفرق وأندمج مع اللهجات، لأن الفصحى مدتنيش الفرصة لده.

غير كده الرواية كانت جميلة وممتعة جدا، وبإذن الله قريب نشوف باقي أعمال الكاتبة عشان نكرر الدقايق الممتعة اللي بنطالع فيها أعمالها بشغف كده♥!

#ريڤيو_بس_مش_ريڤيو.

#زينب_إسماعيل.