ولأول مرة أحس إن ال٥ نجوم مش كفاية..

ولأول مرة بعد الانتهاء من كتاب أقول لنفسي لو الكتاب دة حيكون أخر قراءاتي لأي سبب أنا حوقف قراءة و أنا مبسوطة..

في روايات كتبت لكي تعاش ليس فقط لكي تقرأ و هذه الرواية بالتأكيد واحدة منهم❤️

في حضرة العنقاء والخل الوفي رواية آسرة للكاتب الكويتي المبدع إسماعيل فهد إسماعيل وهي رواية تناقش قضية ومأساة البدون والتي تعتبر واحدة من أهم التحديات المجتمعية الراهنة في الكويت و التي منذ صدور قانون الجنسية في بداية الستينات وحتى الآن بلا حل حقيقي...

بطل الرواية المنتمي لفئة البدون اسمه منسي وهو فعلاً كان منسي..

منسي من زوجته..من ابنته..منسي حتي في وطنه..

لاخيار أمامه غير أنْ يواصل الحياة عند الهامش أو حتي فيه أحياناً...

"أنا في خانة من الأوراق الرسمية غير كويتي، إنْ كنت كذلك أنا ماذا.."

هو بدون..بدون جنسية..بدون جواز سفر ..مخالف لقانون الاقامة، مقيم بصورة غير شرعية..يحاول في رسالة لإبنته الوحيدة -التي لم يراها-أن يكتب تاريخه، ويستعيد تفاصيل معاناته..

هو الأب بدون وطن يعيش في بلد تعتبره عبء ثقيل و تجهدُ في الخلاص منه ..

"هناك مواطِن، وهناك غير. من حقّ المواطن أنْ، ومن حقّ غيره أنْ يشرب البحر..."

السرد في الرواية شبيه لإسلوب ساراماغو في الكتابة بل أقدر أقول إنه أصعب منه كمان ...

الرواية كلها فصل واحد..السرد متداخل مع الحوار ومع أفكار البطل التي تدور في رأسه...مفيش أي فاصل بينهم...رواية مكتوبة بإحترافية و صعبة جداً في قراءتها ...محتاجة تركيز جامد لدرجة إن في بعض الجمل مبتورة بطريقة مقصودة و عليك إنت إنك تكملها بنفسك و كإن القارئ مشارك في كتابة هذا العمل الأستثنائي...

علي الرغم من صعوبة العمل إلا إن قراءته كانت ممتعة بشكل غير عادي ..في حميمية و دفء في كل كلمة و حتلاقي نفسك مش قادر تسيب الكتاب حتي و إنت مرهق من كتر التركيز...ومن كتر ما العمل حقيقي وموجع في تفاصيله أنا شكيت إن الكاتب ممكن يكون هو نفسه بدون..

الأحداث مشوقة جداً ...مفيش كلمة واحدة بالعامية الكويتي... مفيش جملة موجودة بدون داعي ...في تنقل مذهل بين الحاضر و الماضي ومش لازم يعمل دة في فصل أو حتي في جزء كبير من الصفحة ولكن أحياناً بجملة واحدة بياخدك في حتة تانية و زمن بعيد...

الرواية زي ما فيها معلومات كتير عن البدون و مفيدة جداً لأي قارئ غير ملم بالموضوع و لكنها أيضاً فيها جزء كبير عن فترة اجتياح العراق للكويت عام ١٩٩٠ وألقي الضوء علي المقاومة الكويتية..تأثير الحرب علي نفسية المواطنين وحاجات كتير ويمكن تكون من أحلي الروايات اللي قرأتها في كيفية تناولها لهذا الموضوع المهم و بذكر تفاصيل كنت أول مرة أعرفها كمان....

هذه الرواية بعتبرها من أحلي الروايات العربية التي قرأتها منذ فترة طويلة و بجد ممكن أعتبرها من أجمل ٥ روايات قرأتهم في حياتي كلها...

رواية متقنة في كل جوانبها...مبهرة في تفاصيلها..استثنائية في طريقة كتابتها...

ويبقي السؤال في كام واحد زي منسي؟

كام واحد حاسس بغربة في وطنه ومش شرط يكون بدون.. ؟

كام واحد بيطالب بحرية..بعدالة إجتماعية..بكرامة إنسانية؟

مشكلة البدون مش مشكلة في الكويت بس ..مشكلة البدون هي مشكلة المواطن في كل البلاد العربية !

"أيّهما مرهون بالآخر وثيقة تملك بيت أم وثيقة إنتماء لوطن.."

هكذا تكتب الروايات و لمثل هذه الكتب فقط...أنا أقرأ 😍