اللي أنا قريته ده كابوس مش رواية، زي مالواحد في الكوابيس بيكون ساعات عارف هو خايف من ايه بس احداث الكابوس ملخبطة ومش منطقية في تسلسلها، هو ده بالظبط الاسلوب اللي ابدع بيه الكاتب قصة دانيال.

الاسلوب كان رائع لسرد قصة الراوي فيها انسان مدمر نفسيا، عنده حالة من الفصام بعد صدمة اغتصابه كطفل من معلمه، فيمر بمراحل نفسية مختلفة، وكل مرحلة منها بيمثلها في عقله شخص تاني معاه طول الوقت بس مش هو. عندنا ابراهيم الانكار وإن اللي حصل ده كان لواحد تاني ودي تفصيلة مهمة لأن ابراهيم هو الشخصية الوحيدة اللي انفصلت كشخص منفصل تماما بإسم مختلف كجزء من انكار المصيبة لكن باقي الانفصامات اللي تعاملت مع تداعياتها واتفرعت من النقطة دي كانو كلهم بإسم دانيال، فعندنا دانيال المنتقم اللي قتل الشيخ، ثم دانيال القاتل اللي وهب حياته لمطاردة امثال الشيخ من مرضى البيدوفيليا في المجتمع، ثم نهاية بدانيال المراقب السلبي اللي هو المفروض الشخصية الأساسية.

ده الجزء المعلوم من الكابوس، لكن سردية الرواية نفسها هي اللي فيها تحدي للقارئ، مع إن الفصول قصيرة وسريعة، وشخصيات دانيال المختلفة متقسمة لعصور اربعة وده يسهل متابعة انهي منظور للاحداث بيتم حكيه، بس التحدي هنا هو استخلاص القصة الحقيقية من اربع روايات مختلفة.

الفكرة ممتازة وبتطرح قضية مهمة عن اغتصاب الأطفال وتأثيره المدمر، الكتابة معبرة جدا عن حجم المأساة وإزاي دانيال عاش غريب عن العالم فاقد الثقة في نفسه وفي المجتمع.

الشيئ الوحيد اللي فضل محيرني هو الأرشيف، هل ده مكان حقيقي اشتغل فيه دانيال ولا ده لأ؟

يؤسفني انها لم تصل للقائمة القصيرة

MiM