لقد انتهيت للتو من رواية سُجلت في قائمتي الشخصية لأفضل ١٠ روايات في السنة 👌
بنبدء احداث العمل بضبع مسعور و الجوع بيقطع ف بطنه ماشي في طرقات قرية فقيرة.. و بيقتحم بيت فيه اب و ام باين عليهم الضعف الجسدي و الوهن.. بيستغل الضبع حالتهم و يخطف ابنهم من علي سريره و يبدء انه ياكله وهم في حالة ذهول تام.. و في اخر لحظات بيدخل شخص يقتل الضبع و ينقذ الطفل!!
مقدمة تخليك ك قارئ تشتري و تاكل ورق الكتاب وصولاً للنهاية 🔥
انا بشوف ان الكاتب لما يختار يكتب ف رواية تاريخية دا شيء صعب لان ببساطة دا زمن هو نفسه مكنش عايش فيه ف ازاي هيوصل للقراء المشاهد و الوصف و كهذا... طب هل هيثم موسي نجح في دا؟!
احب اقول اني اندهشت من لغة و سرد الكاتب الي خلتني زي ما اكون ركبت آله زمن و رحت لفاجعة الشدة المستنصرية
اول عمل للكاتب معايا و هبدء في ديمونولوجي قريبا لانه موهوب
سرد العمل كُتب بلغة عربية فصحي بالفاظ و تعابير غير معاصرة في عصرنا الحالي.. حتي اسماء الشخصيات و الحوار - الي كان فصحي و عظيم - كان مختار بعناية شديدة و كل كلمة و حرف حرفياً الكاتب عرف يحطها في المكان الصح ب اللفظ الصح عشان يعمل معايشة للقارئ في الزمن الي بيدور في العمل
الوصف في العمل في اعلي اعلي درجاته للمشهادية السنيمائية.. سرد بصوت و صورة 👌
كل مكان و مشهد في العمل انا شفته و سمعته و كنت عايش مع شخصيات الرواية
الشخصيات بقي... كل شخصية في العمل تم تصميمها بشكل خرافي و بناء تاريخي كمان عشان تتقبل تصرفات و افعال كل شخصية و أشيد بشخصية ((غرير))
بيجاد، ام البراء، عبدالرزاق.... والله تعلقت بكل شخصبات العمل لقوة تصميمها و وضعها في قالب الاحداث احب اقولك كمان يا صديقي ان الكاتب صمم حيوانات عشان تكون جزء من حبكة العمل و احب اقولك برده انك هتتعلق بيهم
الرواية يا جماعة بتتكلم عن فترة عار علي تاريخ البشرية.. فترة شهدت الكثير من الدماء و العنف و انعدام الآدامية.. مجاعة قامت في البلاد أدت لكوارث و احداث لا يتقبلها عقل بشري
يكفيني اقولك انك هتشوف في العمل دا تجار لحم بشري و دا اصبح شيء طبيعي وقتها ‼️
تحتوي الرواية كمان علي جرعة شديدة القسوي من الرعب المعوي والي كان بالمناسبة مش مقحم بل بالعكس تماما.. دي فترة البشر فيها كلوا بعض حرفيا فبدون المشاهد دي مش هتعرف تتعايش.. ضيف النقطة الي اتكلمت فيها في الاول وهي قوة وصف العمل.. ف الموضوع فعلا كان صعب بس ممتع.. الرواية كلها ممتعة و صعب تزهق منها
شيء كمان عجبني وهو حرص الكاتب علي وضع مراجع من كتب تاريخية لتوثيق بعض احداث العمل ⚠️
و نأتي للنهاية الي كانت في قمة ذروتها.. و تم الصعود لها بخفة.. بل الكاتب كان بيبني لها من اول اجزاء العمل
الخلاصة.. عمل في قمة المتعة بسرد قوي ملائم للفترة الي بيدور فيها الاحداث.. وصف سينمائي
نهاية قوية احداث مفجعة.. أضمن لك رحلة شيقة يا عزيزي
وشكرا ا/ هيثم موسي