.
كتاب صغير وعدد صفحاته بسيطه بس بيشرح الاقتصاد بطريقه مبسطه مناسبه للي زي حالاتي ماخدوش اقتصاد في المدرسه .
انا لقيت اجابه لسؤال كنت بسأله لنفسي و اكيد برضه كتير بيسألوه لنفسهم ، ليه الدول الاوروبيه متقدمه علميا عن الدول التانيه ؟ هل الشعوب الاوروبيه اذكي او بيشتغلوا اكتر مثلا؟ الاجابه بتاعته كانت ان دول اوروبا معظمها علي نفس خطوط العرض فالجو متشابه لحد كبير و النشاطات الزراعيه و الصناعيه متشابهه و دي كانت عوامل مساعده للسكان انهم يتنقلوا من بلد لبلد و يتبادلوا الثقافات و المعارف و ينموها لكن لو بصينا لافريقيا مثلا ، هنلاقي ان اغلب الدول المناخ بتاعها مختلف و علي خطوط عرض مختلفه ، و ده منع الناس انهم يتشاركوا نفس اسلوب الحياه و يطوروه.
، الكتاب بيمشي معانا من اول اختراع الكتابه علشان يكتبوا الديون و المحاصيل لاختراع العملات ، ازاي البنوك بتشتغل و تدي قروض (الحته دي صدمتني 🙃) ،للمساجين في الحرب العالميه التانيه لما استخدموا السجاير كعمله و النظام الاقتصادي اللي نشأ جوه السجن بسبب السجاير ،للبت كوين و ليه البت كوين ممكن تسبب انهيار الاقتصاد و اخيرا هل الاقتصاد مفروض يبقي محكوم بالدوله و لا يتم التحكم فيه بالديمقراطيه .
الكتاب لطيف و سهل في قرايته جدا و مش ممل اطلاقا و دي علامه ان اللي كاتبه بيفهم كويس جدا في الموضوع اللي بيكتب فيه .
ارشحه لقرايه ويك اند