انا قرأت الرواية بعد ما لقيت ترشيح حساب ابجد على الفيسبوك ليها..وبعدين استغربت جدا لما لقيت تقييمها ع التطبيق ٥/٥
الأكيد انها متستحقش العلامة الكاملة... بالنسبة ليا في مشاكل كتيرجدا ف الرواية.
١- الرتم بطيييييئ جدا ..المفروض الرواية البوليسية أو رواية الجريمة دائما بتبتدي بالجريمة أو اللغز ..الرواية لحد صفحة ٥٠ يعني تقريبا خمس عدد الصفحات ع تطبيق ابجد ع الموبايل بدون اي حدث مشوق ..وقت كبير جدا بنحكي ماضي الشخصيات اللي انا ف اول الرواية معرفش اهميتهم ايه
٢- الوصف الزيادة اوي عن اللزوم اللي يوصل لحد المط والتطويل الواضح جدااا..النادل والخادمة وصفولنا حياتهم الشخصية وظروفهم الاقتصادية وده المفروض انهم ف استجواب ف قضية قتل..عمار اللي هو مش شخصية محورية بنوصف الطبيخ والأكل اللي بياكله ..بنوصف مشاعر و شوارع وفنادق وفساتين
٣- التنقلات الزمنية المربكة ف اول الرواية ..ليه ثمانينات وبعدين ستينات واطلع تسعينات ..ارجع تاني تمانينات وانط لبعد الألفين ..مزعج جدا خصوصا الكاتب بيحكي ماضي شخصية...الترتيب الزمني كان هيبقى افضل.
٤- ايه التشويق اللي قصده الكاتب من أنه يوهمني أن في شخصيتين باسمين مختلفين ويقصد ف نص الرواية الاول أن ياكد ده بمشاهد متتالية ...وبعدين فجأة يقول انهم نفس الشخص..اتكررت مع كذا شخصية
٥- عدم منطقية كتير من الاحداث اللي تخليك تسال دائما ازاي ده بيحصل
٦- النهاية قائمة ع مجموعة م الصدف صعب العقل يصدقها
٧- اللغة مش قوية هي فصحى سهلة مفيهاش تشبيهات لغوية أو مصطلحات قوية.
ف النهاية خالص احترامي للكاتب ..اتمنى له التوفيق في أعماله القادمة.