#ماراثون_القراءة_مع_بيت_الياسمين
بالك يا حاج منير، أنا عمري ما فكرت اقرا للمحروس محمد ابنك كلمتين ولا حتي كراسة... لكن تقول ايه الطبع غلاب.. من قيمة يومين كنت باتمشى في حاجة كده عاملة زي المكتبة اسمها أبجد.... لأ يا حاج ابجد هوز حطي كلمن دي غنيوة للست ليلى مراد... انما أبجد حاجة زي المكتبة وجمبها مكتبة تانية أبهة برضه.. مكتبة وهبان... المهم وانا بابص على رصة الكتب كتير كتير.. قوم لقيت كتاب غريب قوي.. قال ايه: حاطط الجلدة القدمانية أكنها علبة سجاير كيلوباترا عادة... عادة يا حاج مش سوبر... فاكرها .. كنا بنحطها في جيبنا واحنا رايحين نقضي مصالحنا عشان لم نعزم بيها ولا حد يدب ايده فيها ويطلع له سيجارة يشربها وتلاتة أربعة جمبهم طفاسة تبقى خسارتنا في الضيق وما نلطمش.... عندك حق كانت سجاير زبالة لا مؤاخذة... السوبر برقبتها .. ولا المالللبورو ولا الكنت..
المهم ياحاج لقيته شايل اسم كليوباترا وكاتب بداله: "وقائع مسروق بن مسروق"... خطه بقى حلو قوي يا حاج.. أنا فاكر زمان وهو صغير كان خطه عاديك ما يتقريش... باضرب عيني لتحت التقيت مكتوب اسمه "محمد منير" انا عقل بالي راح على طول على البرنس منير اللي بيغني "صو يا صو حبيبي حبسوه" ... قالوا لي لأ ده واحد تاني.. قلت يمكن تشابه اسامي زي ما كان الحاج محمود بكر بتاع الكورة بيقول... قالوا لي لأ برضه... لما بحثت واتقصيت لقيته اسم الله على مقامك ابنك... قلت ما بدهاش يا واد با درش لزمًا تفوت على اخوك وعشرة عمرك الحاج منير تفرحه..
الشهادة لله يا حاج أنا اما قريت اللي كاتبه المحروس ابنك اتكيفت قوي واستمخيت... أصله كاتب كل اللي عشناه وعايشينه وهانعيشه كمان وكمان ... زي ما باقولك كده....
الباشا أمين الشرطة اللي عامل زي المنشار طالع واكل نازل واكل.... والحكومة اللى حاطة ايدها في جيوبنا عمال على بطال... وحودة الفلاتي مرشح الحكومة اللي اتمرمطنا في الشوارع ياما عشان ينجح وآخرها الاقى ايد الصول بلال قافشة على قفايا ويقول لي: غور شوف لك تربة تلمك.... ولما اتمسكنا أنا وأبانوب صاحبي في ربع مظاهرة عشان قنبلة انفجرت قدم الكنيسة وخدونا ع القسم وعينك ما تشوف إلا النور لما المأمور شافنا .. طلع كمية أصوات من مناخيره مع زوره... ويا روح امك ... وسيد أمك ... ودين أمك .... وحاجات تانية ليها علاقة بالأم برضه... واتعلقنا من رجلينا واخدنا علقة موت نسيتنا اسامينا...
إن جيت للحق كتاب محترم يا حاج.. بس لي عتاب صغنن عليه .. إزاي ما يجيبش سيرتي وانا عشرة عمر ابوه ما كناش بنتفارق... في التخشيبة سوا ... قدام لجنة الانتخابات ورا بعض لزم... في طابور الزيت والرز ايد واحدة... ملحوقة في الكتاب الجاي بإذن الله....
ايه؟ تقييم ايه يا حاج؟ خللى الطابق مستور... ان جبت لك من الآخر وخلاص كتاب محترم... عايز ايه أكتر من كده..
أسكت... دا جزاتي اني با انورك على عمايل ابنك... ما كانش العشم ...
آه جالك صداع... معلش ... ابعت اجيب لك حبيتين ريفو... يا واد يا عوض...