الرواية صغيرة مش كبيرة، بتبدأ كجريمة وبتكمل كخيال علمي، في الاول بتنط مع اكتر من شخصية لأكتر من حدث هتحس ان في رابط غامض بينهم بس مش هتكون مستقر مع شخصية واحدة لفترة او حدث واحد الا بعد شوية مش من بدايتها. النقطة دي عجبتني الطريقة اللي اتعملت بيها لإنها رغم انك مش ماسك الحبكة لسة بالظبط الا انها اتكتبت ببساطة، فمتهتش.
بمعنى؟، بمعنى ان الجريمة نفسها او الخط الاساسي اللي اتمسك بيه حبكة الرواية ده، مكانش فيه استعراض لقدرة الكاتب على انه يخلق الجريمة المتفرعة الكبيرة ويرمي انتباه القارئ في مليون اتجاه، دي حتة شفت كتير بيقع فيها وبتيجي عند نقطة بتفصلك من الرواية بالكامل، غير انك بتبقى عارف ان الكاتب او الكاتبة بيعمل كدة بقصد علشان يتوهك، فانت بتلاقي نفسك خمنت النهاية + حسيت بإحباط لإن من كتر التفرعات الخيوط متجمعتش كلها.
ده محصلش هنا، ودي كانت نقطة قوة حلوة جدًا عجبتني وخلتني اكمل.
اسلوب الكتابة في السرد والحوار كان ناضج، ده كان نقطة قوة تانية حلوة جدًا. العمل مفيهوش استسهال ومفيهوش استعراض، وبالتالي هيعجب اللي مبيقراش تقيل واللي متعود عالقراءة الثقيلة.
حبيت الرواية من اولها لآخرها بصراحة، حبيت المعلومات اللي اتذكرت في الرواية جدًا والاسلوب اللي اتعرضت بيه، يمكن الحاجتين الوحيدين اللي ضايقوني شوية اني كنت محتاجة تفاصيل اكتر عن الشخصيات، عمق اكبر للشخصية بحيث احس بإني متعاطفة معاها او كارهاها، والرواية كانت محتاجة تطول حبة، لإن النهاية جت سريعة جدًا مقارنة بالجزء اللي قبلها كله.
لكن كمجمل كانت تجربة حلوة جدًا واستمتعت بيها بصراحة، خلصتها في يوم