الكتاب بيشرح -او بيوثق بشكل اصح - لدور نص مليون مصري في الحرب العالميه الاولي .
في بدايه الحرب العالميه الاولي ، طمأنت انجلترا المصريين انهم مش هيبقوا طرف في الحرب . في الفتره دي ، كانت مصر تحت الاستعمار البريطاني .
مع دورات عجله الحرب ، احتاجت انجلترا ناس تساعد الجيش البريطاني . في الفتره دي ، كانت فرنسا بتاخد سكان المستوطنات الفرنسيه في افريقيا علشان يحاربوا معاهم فانجلترا قرروا انهم يعملوا زيهم بالظبط .
فنزل الجيش الانجليزي للعمد بتوع القري و قالولهم لموا الفلاحين علشان عايزينهم . العمده بتاع القريه كان بيقعد يلم الشباب الفقير و بعديه الشباب من العائلات اللي بتخالفه اما الشباب من العائلات الغنيه فاهلهم كانوا بيدفعوا فلوس علشان العمده ميبعتهمش. عمد كتير اغتنوا بالطريقه دي .
بعد ما الفلاحين كانوا بيتلموا ، كانوا بيتربطوا بالحبال و بيضربوا علشان يختموا علي ورق انهم متطوعين في الجيش و اللي مكانش عنده ختم ، كان في واحد بتاع اختام قاعد بره القسم علشان يطلعله ختم . طبعا الفلاحيين كانوا اميين ، لا بيقروا ولا بيكتبوا فهم بيختموا (او يمضوا ) علي حاجه هم مش فاهمينها .
بعد ما الفلاحين بيختموا الورق ، بيترحل الفلاحين في القطر و وراهم طابور من الستات و العيال اللي بتصوت علي الرجاله اللي اتخطفت .
و من هنا تبدأ رحله الفيلق المصري في الحرب العالميه الاولي .
الكتاب يحسب ليه انه كاتب المراجع ورا كل فصل ، و الكاتب اوضح انه علشان يلاقي المعلومات اضطر يجيبها من المتاحف و المؤلفات الانجليزيه علشان الاحداث مش موثقه تاريخيا كفايه في التاريخ المصري.
الكتاب هصنفه مرجعي اكتر منه ادبي .
بالنسبالي ، الكتاب كان ممكن يبقي مكتوب و محبوك بطريقه افضل لان احيانا بحس ان نفس الجمل بتتكرر كل كام صفحه فعلشان كده هصنفه ككتاب وثائقي مش كتاب ادبي .
الفكره و التوثيق : ⭐️⭐️⭐️⭐️⭐️
الكتابه:⭐️⭐️⭐️
لو حد بيهتم بالتاريخ و السياسه ، في الاغلب هيلاقيه كتاب ممتاز .