المعالج العظيم ده بيوضحلنا فى الكتاب ايه هى الأساليب التى بنخدع بيها نفسنا وازاى نحرر نفسنا من الوهم اللى بنعيش فيه.
مش من مجرد كلام نظرى ولكن من خلال عشرات الحكايات والأمثلة من داخل العيادة النفسية على شكل حوار بين المعالج والعميل 🤝
الكاتب بيوضحلنا ازاى ان السبب الظاهري لمعاناتنا مش هو السبب الحقيقي! وبيكشفلنا عن الأمور اللى بنخاف منها وازاى نلاقى طريقة لمواجهتها.
هنتعرف فى الكتاب على الأكاذيب اللي بنخدع بها نفسنا وازاى نواجه الحقيقة التى بنتهرب منها، هنفهم ليه بنستمر في البقاء مع شخص بيسيء لينا وليه بنقول "نعم" واحنا نفسنا نقول "لا"، وازاى نوقف ده.
الكتاب ده علمنى ان المعاناة مش بتيجى من الألم لكن من المحاولات المستمرة لتجنب الألم من خلال الأكاذيب اللى بنغذى بيها صورتنا الخادعة عن انفسنا طوال الوقت واستخدامنا المفرط لدفاعاتنا النفسية فى غير محلها.
الكتاب بيعيشك تجربة العلاج النفسى كأنك جوة العيادة النفسية عشان تفهم ان العلاج مش مجرد محادثة؛ إنما علاقة بين شخصين بيتعاونوا مع بعض لمواجهة أعمق حقائق الحياة عشان يوصلوا للتعافى سوا