اعتبر اليوم من أسعد الايام لأني اري كتاب صديقة عزيزة يرى النور وسعيدة اكتر انيّ صاحبة اول ريڤيو له لأني قرأت الكتاب exclusive 🙌

كتاب حكت لي صديقتى عنه كتير قبل ان اكون من اول قارئيه.

' على نهر كلايد ' كتاب هبة هنداوي التالت وبالطبع متميز زي سابقيه وزي كاتبته.

كتاب يحكى قصة هبة في اسكتلندا لما سافرت مع جوزها وهو بيعمل رسالة الدكتوراه وكانت اكتر بكتير من مجرد مرافق رايحة بعيالها مع جوزها.

لو كنت تعرف اي شيء عن البلد دي تأكد ان بعد الكتاب دة هتعرف اكتر كتير وهتشوف لمحات وجوانب غير خالص ما انت متوقع.

الكتاب شيء ساحر كدة كومبو بين ادب الرحلات والتجربة الذاتية والرواية - شيء لا استطيع تصنيفه ولا تسميته بنوع محدد بس اقدر اقول بكل ثقة انه كتاب ساحر مش هتعرف تسيبه.

بدأت هبة مستهل المقدمة بجملة : بحذاء رياضي وحقيبة ظهر بدأت رحلتي في الغربة من نهر النيل الي نهر كلايد...الجملة دي بعدها مش هتقدر توقف قراية - ٣ سنين من المغامرات وثّقهم قلم هنداوي المتمكن ووصفت حاجات عادية في بلد غير عادية عليها - مواقف وطرائف جعلت من تجربة المرواح للمدرسة والمستشفى والمحكمة وقسم البوليس والحدائق والمتنزهات تجربة خاصة مووووت بعيون ورؤية مصرية اوي اوي.

بدأت رحلة هبة من مطار هيثرو وصولاً لجلاسجو مرورا بأكتشافات كتير انا واثقة ان اهل البلد في منهم ميعرفوهاش ومشاعر فياضة نبضت بها السطور في الكتاب.

تعرفت هبة على الناس والشعب وبقى عندها دايرة معارف - بس دايرة اكبر من انهم خواجات من اسكتلندا، نو ابسلوتلي😂

هبة عرفت العالم كله من جلاسجو : اشي عرب على شوام على افغان على هنود على اسكتلنديين على افارقة - خريطة العالم عرفتها هبة على رقعة واحدة.

مكانتش كل تجربة هبة سهلة هناك - كونها محجبة وباين انها مسلمة عرضها لمواقف قاسية وسخيفة ومخيفة، تعرضت للأعتداء كذا مرة ومش هدي تفاصيل علشان محرقش 🤦‍♀️

ممكن اكتب الريڤيو عن ' على نهر كلايد ' ليمتد لصفحات بس مش عايزة احرم القارىء من المتعة لو اتكلمت في تفاصيل اكتر.

نيجي بقى لشوية نقاط عن الكتاب ككل:

- اسلوب الكتاب سهل ولغته غنية من غير فزلكة - سواء شاطر في العربي او لأ هتعرف تقراه بدون صعوبات

- هبة تأخذك معها كما اخذنا ابن بطوطة في رحالته، رحنا وجينا معاها واحنا في مكانا

- دة تالت كتاب لهبة، اولهم كان سيرة ذاتية والتاني مجموعة قصصية والتالت ادب رحلات في شكل روائي ، ومن هنا انادي بقوة ان هبة تكتب رواية لأني واثقة انها هتبهرنا، لا اعتقد ان في لون لن تتقنه هبة.

- اخيراً حابة اقول ان اسلوب هبة مع الموضوعات ومع المفردات ومع الجزء المصري والعربي اوي في الكتاب يجعل منه اكتر من كتاب يجب قرائته، دي رحلة حلوة بتاخدك معاها مع كل صفحة ، ومع اخر صفحة بتزعل انه خلص.

- تخوض هبة تجربة النشر الرقمي مع ودي خطوة محمودة وذكية - شاطرة يا هبة حقيقي👍

اتمنى لك كل التوفيق يا هبة - شهادتي فيك مجروحة والله وبتعلم منك ومن اسلوبك ومن جمال ونبل اخلاقك.

الكتابة رسالة والكاتب عنوان لهذه الرسالة وانت يا هبة مشرفانا وبنتفشخر بيكي♥️