جميل اوي لما تلاقي كتاب بيتكلم عنك شخصيا و بيحكي حلم من احلامك و تحس كأنه مرسوم قدامك بألوانه و ريحته ، تقدر تلمسه و تحس طعمه و تشوف نفسك بتتحرك جواه

و الاجمل لما تشوف الكاتب نفسه و تقعد تسمعه و هو بيحكيه و تحس كأنك صاحبه ماشي معاه جوا الكتاب و يبقي حظك حلو اوي لو قابلته شخصيا و تقعد و تحكي و تهزر و تضحك معاه كأنكم صحاب من زمن

طبيعتي كشخصية بتعشق السفر جدا و هو جزء كبير و مهم من شخصيتي ، ادب الرحلات ممتع جدا بالنسبه لي و بعتبره شباك بتفرج منه علي العالم لحد ما اسافر اروحه بنفسي ، و ايران كانت و ما زالت من اهم احلامي في السفر ، فا طبيعي كتاب زي مسافر الكنبه الي ايران مش بس كتاب حلو ، لا دا مرجع للمسافرين الطايشين اللي زيي ، بيناقش فيه طرق مختلفه للسفر و الاقامه و كمان بيتعرض فيه لاكتر مكان غامض في العالم و يكشف بعض اسرار مجتمعه اللي مش منتشره للعامه و هو ايران بتنوعها الجغرافي و الديني و الثقافي و السياسي

الكتاب ده مش بس بتقراه ، لا دا تذكره سفر لايران ، هتمشي فيها مع عمرو كانك جنبه فعلا ... شايف و سامع و لامس و بتدوق الاكل كمان

شكرا يا Amr Badawy علي انك كتبتلنا الكتاب ده و انك قررت تدينا كلنا اجنحه نسافر بيها العالم كله معاك

عن دار مقام للنشر والتوزيع