الكاتبات والوحدة كتاب مكتوب بمنتهي الصدق والرقة والعذوبة للكاتبة المصرية ،بنت بلدنا الحلوة نورا ناجي...

الكتاب عبارة عن مجموعة مقالات تتحدث فيهم الكاتبة عن عشر كاتبات ،حياتهم كانت قاسية و كانوا يشعرن بالوحدة بدرجات متفاوتة.وقعت كل منهن في فخاخ الجنون أو الانتحار أو اضطراب الهوية أو ذنب الأمومة ...

معظم الكاتبات كنت أعرفهم و قرأت لهم قبل كدة لكن في كاتبات كنت أول مرة أسمع عنهم مثل أروي صالح و فاليري سولانس وكنت شايفة إن سيلفيا بلاث كانت لازم تكون موجودة في إحدي فصول هذا الكتاب الممتع...

أكتر حاجة عجبتني في الكتاب هي محاولة الكاتبة إكتشاف ذاتها من خلال حياة هؤلاء الكاتبات و إزاي كانت بتتكلم عن نفسها ، عن أجزاء من حياتها الشخصية وحتي عن لحظات ضعفها بمنتهي الصدق والشفافية وتحس إنها فعلاً بتتكلم من قلبها و دايماً الكلام اللي طالع من القلب بيوصل علطول وبمنتهي البساطة...

في رابط وثيق بين الكاتبات والوحدة وأري أيضاً إن نفس الرابط موجود بين القارئات والوحدة..

الوحدة هنا مش معناها إنك لا تملك عائلة أو أصدقاء أو عايش لوحدك بالعكس..أنت ممكن تكون تملك كل دول و مع ذلك حاسس إنك لوحدك أو حاسس إنك في غربة و عاوز تنعزل و تبعد بس مش دايماً بتقدر...

الكاتب رائع الصراحة..حيلمس كل كاتب و كاتبة وكل قارئ و قارئة ..عجبني جداً و كنت أتمني يكون حجمه أكبر..

تاني لقاء مع نورا ناجي بعد مجموعتها القصصية مثل الأفلام الساذجة بس الصراحة أنا وجدت هنا نورا ناجي أعمق و أنضج و أحلي بكتير وأتمني تجاربي القادمة معاها تكون بنفس المستوي..

ينصح به..جداً..

"الوحدة في نفس الوقت وَنَسٌ، ليست بالضرورة جافة ولا فارغة، أحيانًا تكون الوحدة مليئة بالحياة والموسيقى والكتابة والقراءة وأكواب الشاي الساخنة التي أشربها وحدي فأشعر أنني محاطة بالدفء"😍