اسطاسية.. خيرى شلبى

الريف المصرى بين الماضى والحاضر مااعتقدش إن فيه حد كتب لحد دلوقتى على الأقل بالنسبة لى بالجمال والتفصيل والصدق والحميمية اللى كتب بيها خيرى شلبى عن الريف المصرى على المستوى الإجتماعى والثقافى والقيمى وطبيعته فى كل شئ تقريبا زيه..

اسطاسية رواية مش من الأقوى بين أعمال خيرى شلبى لكنها تستحق القراءة وممتعة..

الأسم غريب لحد ماتبدأ تقرأ وتعرف مين وايه وليه اسطاسية.. ابتدت وانتهت بيها الرواية..

قرية تبدو هادئة، مسالمة، أهلها طيبين، وهو دا ظاهر الريف المصرى عموما، لكن اللى ورا الظاهر دا حيوات خالية من المثالية، واقع طبيعى.. صراع المصالح والنفوس صوته عالى لكن صوت أصحاب الحق فيه أعلى وبيفرض نفسه حتى لو بالصبر فى انتظار عدل محكمة السماء بعد مايأس من محاكم الأرض والعباد..

الفتنة الطائفية هنا انعكاس للصراع دا مش قضية منفصلة عنه.. ودا اللى هانشوفه فى حقيقة الجريمة اللى وقعت بمقتل شاب مسيحي من قرية صغيرة تجاور قرية بطل الرواية ومنها ابتدت سلسلة الأحداث والروايات اللى بتتحكى على لسان جميع الأطراف ماعدا اسطاسية صاحبة الصوت الأعلى فى الرواية اللى حرك جميع الأحداث.

يمكن ماحبيتش المثالية الزايدة والتسطيح والإستسهال فى الحكم لبعض الشخصيات اللى كتب بيهم خيرى شلبى فى بعض الأجزاء من الرواية، والجزء اللى يخص حمزة فى سير أحداث حياته وعلاقته بأبنة عمه بالرغم من الفروق الإجتماعية والطبقية والثقافية والمادية بينهم، لكن زى ماقلت الرواية مش الأقوى بين أعماله لكنها تستحق القراءة جدا..

ريف مصرى فى عالم خيرى شلبى يعنى مافيش مثاليات، مافيش قوالب محفوظة، لكن فيه حياة نابضة بكل تناقضتها بتستمتع وأنت بتقرأ عنها، والأهم إنها حقيقية مش متخيلة ولا غير واقعية.. فبتفهم وتتعلم عنها لكن من غير ماتحس بأذى أو مرارة بتكون مصاحبة للرواية بعد قرايتها بالرغم من صعوبة الأحداث فيها وهنا بيبان فن وجمال عم خيرى شلبى.. أتمنى للى ناوى يقراها قراءة ممتعة.