نوستالچيا الثمانينات مع أكرم وقدرى الأصحاب
رجعونا لذكريات الطفولة مع لعب قضينا معاها أيام وكانت أقصى أمانينا تجيلنا فى يوم من الأيام او حتى نلعب بها فى بيت حد من أصحابنا ويبقى يا سلاااااام
أو نتلم نسهر قدام فيلم 🎞 فيديو 📼 متأجر من نادى الفيديو اللى فى اول الشارع اللى هناك..
بس قبل ما تعمل هييييييح وتقول ارجع يا زمان حن يا ماضي..
يصحى أكرم على اختفاء… مراته ماجى ومازن ابنهم كمان وهو متخدر ومدروخ مش عارف 🤷🏻♂️ يعمل حاجة يا ولداه
اترعب من فكرة انه ممكن يكون اللى فى باله رجع للإنتقام … ما هو اللى بيحصل شىء خارق ومايعملوش حرامى مولات 😄
معقول اللى حصل فى الثمانينات لسه فاكرنا وحططنا فى الدماغ
ماكنتش ليلة 🌙 روحنا فيها متحف السيرك المتنقل اللى بيقام كل عام فى قريتنا المتواضعة وبيتهافت طبعا عليه أمثالنا من الأبرياء ..
مش بقولكم ثمانينات زمن البراءة فى الخروجات والطموحات 😁 وياريتنا كنا عاجبين اهالينا كمان 🫣
ما علينا بلاش نفتح فى الذكريات …
بس اعرف أن من يومها اتغير حال الأصحاب…
وحياتهم اتشقلبت تماما بعد اللى شافوه فى متحف الشمع اياه … صدمة طفولة هتشكلهم سنين قدام
هتغير من طباعهم وتصرفاتهم وقرارتهم المستقبلية كمان
« ليحذر من يحارب 🗡الوحوش 👹 من أن يتحول لوحش » 👹
آه ونسيت اقولكم أن الأصحاب انضم ليهم " صديقة " كمان "نسرين" صحيح هى اكبر منهم بأعوام بس ربطتهم صداقة قوية لحد ما … حصل اللى حصل فى قصر " سليمان " 😱
كفاية حرق 🔥 فى الأحداث بقى لان الرواية تستاهل تستمتع بتفاصيلها وتعيش مع أحداثها
حقيقى روايات خالد امين ليها طابع مميز فى فكرتها وبتدينى احساس أنى بتفرج على فيلم 🎞 3️⃣D
علشان كده قبل ما تبدأ اى رواية لخالد أمين هقولك على شوية استعدادات بسيطة لضمان الإستمتاع برواياته 😁
📌 الاضاءة لازم تكون خافتة لزوم السسبنس
📌 حضر فشارك 🍿 جنبك … مشروبك 🥤 … علشان ما تقومش فى نص الرواية
📌 مسموح فى البريك … تتدخل تعمل 🚽😄
بس ما تطولش كتير علشان ماتفصلش من جو التشويق 😉
جهزت الاجواء عيش يا مان
انت ممكن تعمل موسيقى 🎵 تصويرية كمان وانت بتقرأ فى الرواية … أنا مثلا كان جاى فى دماغى
أغنيتين لفريق اعتقد بتوع الثمانينات والتسعينات هيعرفوه
فريق « NaNa « وأغنية Dark man و He’s coming
واللى هيقرأ الرواية هيفهم ليه 😉
نقطة اخيرة 🙋🏼♀️
طولت انا عارفة بس غصب عنى الرواية مليانة احداث ولولا انى خايفة احرقها برغي ده كنت فضفضت ورحرحت واخدت راحتى وبعبعت بكل حاجة حصلت فى الصفحات …
النهاية كانت مفاجأة 😱 وابعد ما يكون عن الخيال
🔖الروايات اذواق وديه عجبتنى لانى بميل للنوع ده من الروايات اللى تسحلنى معاها فى الاحداث وترفع من مستوى ادرينالينك وتخليك عمال تاكل الصفحات … فعذرا بقى لو معجبتش بعض الأشخاص وشافنى ببالغ فى الوصف والتقييمات 🙋🏼♀️
#مكتبة_دنيا
#قراءات_٢٠٢٢
#قراءات_يوليو_٢٠٢٢