من المصادفات الغريبة انى كنت منظم لمعرض الكتاب في الجامعة سنة 2013 وسألني واحد عن الرواية مكنتش اعرفها ولا قرأتها ولا اعرف الكاتبة.. لكن الي فاكره كويس اني سألت صديق كان معايا قالي انه قرأها وعجبته.. واني روحت دورت عن معني العنوان ولاجل الصدفة قرأتها بعد وقت طويل جدا من معرفتي بيها.

الفكرة في انها رواية صغيرة بمقياس روايات النوع ده من الدراما او الرعب عشان بيحبوا يتحركوا كتير في الوصف ويسهبوا في اللعب بالالفاظ عشان الرواية تبيع لكن هنا لا.. الفكرة اتعرضت بشكل مختلف وده هقوله تحت واوضحه من زاويتي انا.

اولا يعني إيه نيكروفيليا هو نكاح الموتي وده هيخليك تفكر انها رواية جنسية وفيها جو الايحاءات والالفاظ لكن يسعدني اقولك لا ،وهو ده الاختلاف الي كنت بقولك عنه فوق..الرواية نضيفة رغم صعوبة الموضوع الي بتحكي فيه وانه ملعب وفيه ألف فرصة للسير في طرق تتسم بالالفاظ والجمل الي تشعوط الرواية وتشد بعض القراء الي جايين ع اسم الرواية لكن الوصف هما بطريقة فيها خواطر او جمل شعرية بسيطة بتوضح الفكرة من غير ما تجرح عينك ولا تخليك مشمئز من الكلام غير نفورك من الفكرة.

نضافة الكتابة والوصف البسيط الي يدخلك الحالة ويعيشك معاه في دقة وصف بسيط بس عميق وواصل دي مهارة انا متوقع اشوفها في قراءاتي الجاية للكاتبة وده شئ اكيد خصوصا اني متابع كتاباتها وباقي الروايات في ليستة القراءة والي باين انها مهتمة جدا بالكتابة في الرعب والكتابة النفسية والي شايفه انها هتكون تلميذة نجيبة لدكتور احمد خالد توفيق في بساطة الوصف مع التكثيف البسيط الغير مخل بالمعني لكنه واصل جدا وواضح من غير كشف.

الحالة الي بتتحط انت فيها مع منسية في اختلاف خطوط الزمن من اول جزء في الرواية بيخليك تتعاظف معاها الاول وبعيدين بتحط حواجز بينك وبينها وترجع تشيلها من مجتمعها وتفكر هل لو كانت في ظروف تانية كان الوضع اختلف وهنا بتاخدك الكاتبة وتقولك الفرق بين رفض الناس للمرض النفسي وبين الظروف المحيطة بالمريض وهل المرض ده مشكلة الشخص ولا هو تراكمات مجتمعة وبيئته؟ ولو نفس الشخص في ظروف تانية هيكون نتاجه مختلف ولا لا ؟ وهنا انت بتلاقي نفسك بتحط نفسك مكانها وتفكر بشكل مختلف من غير ما تلومها بالكامل ولا ترفضها تماما.. الحيرة دي والتردد ده هو الدرس او النصيحة الي الكاتبة حطتها في المقدمة وبروزتها عشان تقولك انك ممكن تعيش حالة وتفكر وتاخذ درس اجتماعي من غير ما ربنا يحكم عليك بإنك تكون في ظرف صعب عشان تتعلم الدرس.

حالة منسية وفُتنة والربط بينهم وفكرة المرض والفقر والرفض المجتمعي وبين انه علي ضياع كل واحدة منهم ألا انهم لاقوا بعض في نقطة ما بتكون نقطة انطلاق حتي لو في الغلط الفكرة هنا ان الانسان المرفوض او المريض النفسي ممكن يكون كويس ومستريح لو لقي حد يقبله من غير ما يشاور ع مرضه ويعتبره وصمة او شئ مؤذي وده الي هي حاولت تتغير فيه او تعيشه مع جاسر ومكملش.

شخصية جاسر هي شخصية مركبة رغم انها كان ممكن يتفرد لها اكتر بس هي آثرت انها تحط الحتت الي هتشتخدمها وتسيبك انت تشوف من مكانك هيعمل إيه وتسيبه محايد انك تحط نفسك مكانه لان كثرة التفاصيل في الشخصية هتبروزه وتبعده عنك وده الي الكاتبة مش عاوزاه.. الابهام في اجزاء ما ازعم إن هدفه تمويه الشخصيات مع القارئ خصوصا ان الرواية مش زحمة لكن معالجتها بتحطك في كرسي من كراسي الابطال وتطلب منك تحط نفسك مكانه قبل ما تحكم عليه.

الرواية بتشرح امراض اجتماعية من سوء معاملة زوج الاب وفكرة الاستغلال الطبي للمرضي والجهل المجتمعي باسباب المرض النفسي ووقعه علي الاشخاص المرضي وعلي من حولهم الي ممكن يكونوا بشكل غير مباشر سبب اساسي في المرض ده بدون إدراك وده جزء ضمني معالج بشكل سهل لكن لو فصلت كل شخصية هتلاقيه واضح ومتشاف.

من الحاجات الي عجبتني في تركيب الشخصيات ان كل شخصية فيها جانب مظلم وآخر مضئ بس ممكن يحضر في اوقات غلط او الظروف بتجبره انه يظهر بالجزء السئ مع الاشخاص الي المفترض محتاجين منه الحلو اكتر بيلاقوا العكس واثر ده علي كل شخصية ونهايتها في الآخر.

رواية قوية في ظلها ومضمونها والرسايل الي ورا كل حدث وشخصية علي قلتهم إلا انهم بيوصلوا نقط مهمة وصعبة جدا لم لقطها وانت بتقرأ هتستمتع جدا بالفكرة وبالكتابة.