الرواية بالفصحى في السرد وعامية في الحوار أنا واحد من الناس الإنتقال من الفصحى للعامية بيعملي error ومبحبش أخوض التجربة دي كتير إلا أن في الرواية دي قدر فؤاد الإنتقال من الفصحى للعامية بسلاسة غير عادية فيها لطافة وقوة وجمال وخلاني أحب التجربة دي معاه … الفصحى قوية ورصينة وبدون فزلكة والعامية واقعية ومناسبة جداً لسياق الكلام.

.

.

رسم الشخصيات جميل جداً وعميق وكل شخصية لها طريقة كلام مختلفة متفقة مع دوافعها وميولها الكاتب اتكلم عن الأحاسيس الداخلية بمونولوج مرتبط بالواقع الخارجي منفصلتش عن الخارج يعني تربط حاجة خارجية عادية (سقوط الكرسي) بتفاعل نفسي راسخ أو قديم عند الشخصية ودي مهارة جميلة … أنا مبحبش الروايات اللي عبارة عن مونولوجات نفسيه بحب الروايات اللي بتجيبلك مواقف وتخليك تعرف نفسية الشخصيات من ردود أفعالهم مش من المونولوجات ودي حاجة بتكون صعبة في الكتابة وصعبة في القراءة كمان … هنا الكاتب عمل خلطة بسيييييطة وسهلة بين داخل الشخصية وبيئتها الخارجية فكسر السهولة المباشرة للمونولوج وإداله دلالة خارجية أو رمزية خارجية وكمان كسر التعقيد لردود الأفعال المعبرة عن دواخل النفس فطلع لنا الخلطة الرقيقة دي في الأسلوب

نييجي للحبكة الحقيقة الكاتب هنا بيكتبلنا بشكل يخليك ترتبط بالشخصية أكتر من الحبكة نفسها بيخليك تربط علاقات مع الشخصيات أكتر من ارتباطك بالحبكة نفسها ودا لون في الكتابة ناس كتير بتحبه والكاتب كان ماهر انه يحسس القارئ ان الشخصيات دي أصحابه أو أهله أو هو نفسه ودا لون من الكتابة عمله بمهارة إلا أني عندي تحفظ على الموضوع دا لأني من الناس اللي بتحب الحبكات وتصاعد الأحداث والسجال في المواقف حتى لو رواية واقعية ومن خلال الأحداث أفهم الشخصيات … فالحبكة هنا مكنتش بالوضوح الكافي إلا أنك مستمتع من عِشرتك للشخصيات اللي بتشوفهم ودا ينقلنا لنقطة تانية إن الرواية أنا حسيتها أطول من اللازم ودا بردوا ممكن يكون بسبب إن الكاتب بيرسملنا الشخصيات وتكوينهم بدقة ودا ممكن يكون بيعجب فئة مش بسيطة من القراء … في بداية الرواية البطل حصله حاجات ادتلي ايحاء بنوع حبكة معينة وكنت عاوز أعرف البطل هيعمل إيه في المشكلة دي وبعد شوية دخلنا في الحبكة الأساسية للرواية وكنت محتاج أعرف طيب المشكلة الأولى راحت فين؟ فعلاً لو لها جزء تاني محتاجين نعرف هيتصرف في مشكلته الأولى إزاي خصوصا أنها مشكلة أصيلة ممكن ترافقه طول العمر …

.

.

الموضوع دا مرتبط جدًا بموضوع الحوار اللي حسيته دقيق لدرجة أقرب للسيناريو وهنا لازم ننوه عن جزئية خطيرة بتدرس في أكاديميات صناعة السينما والقصة وهي الفرق بين إدراك خيال القارئ وإدراك عين المُشاهد ودا موضوع كبير

.

. في العموم الرواية جميلة بحق ومصدر للمتعة فعلاً وبتخلي الخيال ينساب بسلاسة ولطف بتحرك في القلب التفكير والتدبر وبتستفيد منها أنك بتقدر من خلالها تشوف التغيرات في الشخصيات المحيطة حواليك وتطابقه بتصرفاتهم وكلامهم مع تحفظي علي زيادة الحوار مع أنه قد يكون مناسب جداً لنوع القارئ اللي بيحب يحس إن الشخصية قريبه أو صديقه أو حد من معارفه .

التقييم ولست أهلاً للتقييم

(لقد حققت الرواية أن تكون عمل أدبي يحرك العقل والقلب فيجازينا بالمتعة)