كالعادة بلال فضل من أعظم الحكائيين و تكمن حلاوة الحكاية أنه أم ميمي موجودة بشكل أو بآخر كان لغالبية سكان المناطق الشعبية و مدن الأقاليم و انا قابلت نموذج أم رباب واللي كانت قادرة علي مواجهة أعتي الطغاة والعتاة و بلسانها الزفر الذي كان كموس حاد يقطع علي أي عاقل محاولة الحوار معاها أو مجارتها لأنها في الآخر عندها قدرة عظيمة علي فشخ اي حد حتي جوزها مسلمش منها لدرجة أنه فيه حادثة مشهورة قطعت فيها صوابعه عشان تشتكي جوزها و اللي قررت انها تخرشمه في عينيه و محضر قصاد محضر اتصافت أم رباب مع جوزها و رجعوا سمن علي عسل لكن كانت قد فقدت كام عقلة و هو فقد احدي حبيبتيه ليعيش باقي حياته لابس نضارة شمس ليل و نهار عشان منشوفش فيها عينيه ..

ام ميمي موجودة في حياتنا و الألفاظ اللي مالية الموضوع غير مستغربة بالنسبة ليا لأني عشتها في واقع مشابه و رغم مرارة تجاربنا العديدة ولكن بتفضل ذكريات و وشوش ناس موجودة معانا بشكل أو بآخر..

تحياتي للقاص بلال فضل اللي عيشنا تجربة قد لا تكون شخصية أو واقعية بكامل تفاصيلها لكن حرفيا بلال فضل خلاني شفت الفار و البرص كأني كنت قاعد معاه في غرفة سكن أم ميمي .