أولا اشكر أ. بلال على لفت نظري لوجود تطبيق متميز زي ابجد، واللي انا شايفه حل ممتاز، ووسط، لتوفير الكتب باشتراك مناسب جدا، لقراءتها والواحد مش حاسس بتأنيب ضمير 😅

الرواية كسرد.. فطبعا أ. بلال فضل متربع على عرش الحكائين بالنسبة لي بعد أ. خيري شلبي الله يرحمه

مع الفارق اني اتشديت للأحداث من اول صفحة

وتقريبا خلصتها في ٣ أيام قراءة

(على عكس روايات خيري شلبي اللي كانت بتبقى صعبة شوية في الأول، لحد ما بالاقي الخيوط بدأت تتجمع وتتضافر بشكل مذهل وممتع)

الرواية بتعمل رصد لفئة شبه منسية من حسابات البلد لدرجة انها وقعت من كل الجوانب..

ماديا، واجتماعيا، واخلاقيا، وتعليميا

فئة ليس لها حظ من أي شئ.. لا تعليم ولا تربية ولا دين ولا شغل

فأصبحت غاية الجري ورا القرش، تبرر أي وسيلة متاحة

السرد ممتع، والرواية رائعة، والتحولات ممتازة

لولا إني من "ذوي الحس المرهف" كما سمانا أ. بلال، واللي حذرنا في بداية الرواية، وخالفت التحذير وقريت لحبي لقراءة كل ما يكتبه (ويذيعه حاليا).. بس ما قدرتش استسيغ هذا الكم من البذاءة في رواية!

ليس انكارا لوجود ناس.. دي حياتهم، وده كلامهم، ودي شتايمهم.. بالعكس، انا شفت بعضا من الكلام ده بعيني، وفي محيط انا عشت فيه

لكن ما زلت مختلف بشدة مع أ. بلال في ان ده مش مبرر عشان يتكتب بهذا الشكل الفج في رواية ممكن اديها لزوجتي او اختي او بنتي

اكيد فيه طريقة اوصل المعنى من غير ما انقل صورة كربونية لبذاءات الناس دي!

وما زلت مقتنع ان من اسباب انتشار البذاءة على السنتنا جميعا دلوقتي، هو تساهلنا في سب اللي شفناهم سارقين البلد وناهبينها في فترة الثورة.. فعلى الرغم من انهم يستحقوا كل هذا السب بالكامل، لكن ده لوحده كسر جوانا حاجز التلفظ بالكلام ده