رواية هذيان
الكاتبة هبه الحسينى
دار نشر بتانة
رواية إنسانية نفسية إجتماعية ويبدو إن هبه الحسينى عايزة تتخصص في المجال دا
الرواية بتناقش فكرة الضعف عند الإنسان والاحساس الدائم بيه والخوف منه والمحاولة للهروب من الضعف دا و البحث عن السند من خلال شخصيات مختلفة من جانب البنت الضعيفة والرجل المريض رغم كونه طبيب وطبعا المرضى.
الرواية كمان ناقشت ازاى بندارى الضعف دا بلصق التهمة بالجن وناقشت الدجل والعلاج بالقرآن بصورة ما قريتهاش قبل كدا الحقيقة
الوصف عامة عند هبه هايل بتعيشك جوا الرواية لحظة بلحظة وتشوفها بعينك لدرجة إن وصفها لنوبة الصرع خلانى قشعرت بصراحة شوفته قدامى وصعب عليا وكمان وصف جلسة الزار كان جميل جدا
الشخصيات مرسومة بدقة ومافيش حد مالوش لزمة كله على قد دوره حبيتهم وكرهتهم بداية ولكن بشكل شخصي علق معايا شخصية الطبيب المريض بالصرع وأدهم الزوج الكبير وتناقض شخصيته.
رحاب البطلة حكاية هاتصعب عليك لو حسيت بألمها وتقول أنا لو مكانها ما كنتش أتحمل وبسرعة هبه تجيب نهاية روحانية جميلة كأنها بتقدملك حل جميل ومثالى للضعف والألم
السرد فصحى سلسة ومافيش ملل ولا لحظة والحوار عامية مناسب للشخصيات وبيساعدك تندمج أكتر
هبه الحسينى عن تجربة روايتين تجيد توصيل المشاعر بالوصف والحوار بدرجة تخليك تبكى مع الشخصية وتحس بالحب وحتى اللحظات الحميمية بين الشخصيات
الرواية حزينة لكن واقعية وجمالها فى كل سطر ويتضاعف الجمال في النهاية خصوصا إن فى رسالة كلنا محتاجين توصلنا
الرواية دى بدون مبالغة جميلة فعلا
سلبيات الرواية ممكن في المعلومات الكتير اللى اتقدمت بشكل مباشر احيانا لكن باعتبار دا العمل الأول للكاتبة فدى ملاحظة بسيطة
التقييم العام ٥ نجوم وتستحق القراءة