🔹اسم الرواية : شجرة الحسيني
"بداية اللعنة"
🔹اسم الكاتب : محمود رضا
🔹نوع الرواية : رعب، إثارة و تشويق
🔹عدد الصفحات : 245 صفحة
⭐التقييم : 🎖️🎖️🎖️🎖️🎖️
في البداية الرواية من ترشيح أحد الأصدقاء
مكنتش متحمس اوي للرواية بما اني قارئ كتير لعمدان النوع ده من الأدب فا بالنسبة لي اني متوقع اغلب التيمات واللي بيتكتب فيها والاسلوب والقصة متوقعة وكده لكن لما بدأتها ولاقيت انها تيمة لعنة الاوراق المجهولة وكده بصراحة أحبطت سيكا لكن قولت لنفسي ومالو نقرأ لحد جديد وخصوصاً انها اول اعماله
بس لما كملت فيها شدتني وبدأت الأحداث تبقي غريبة عليا ومش متوقعة
فيه تركات صغنتتة كده الكاتب بيرميها عجبتني اوي واهمها ان بطل الرواية بيحب روايات الرعب ساعتها بس فهمت ان الكاتب هيخليني اقرأ حاجة جديدة ف التيمة دي 😁
وده اللي حصل فعلاً
تيمة مهروسة الف مرة بأشكال كتير لكن هنا كان الوضع مختلف وممتع لأخر سطر
الأحداث مشوقة جدا جدا جدا ومشاهد الرعب فيها ع الهادي يا زبادي
هتخليك متسيبش الرواية
كان ممكن اخلصها كلها ف قاعدة واحدة بس محبتش ده حبيت استمتع بيها ع نار هادية ،نهايتها بالنسبة لي صدمة غير صدمة تانية ف وسط الاحداث 😁 واخد بالك يا حاج ؟! 😅
بالنسبة للغة الرواية عجبتني اوي
بسيطة مش معقدة ممتعة وتركيب الجمل حكاية واختيار الكلمات مزيكا
حقيقي منشكح جدا ومستمتع جدا جدا جدا
السرد بقي ده اللي متوقعتوش نهائي من الكاتب وكا أول عمل ليه
فعلياً كنت عايش الأحداث بحذافيرها حذفورة حذفورة
وده اللي شدني للرواية
انا مش بعرف اكتب ريفيوهات في الحقيقة بس ده مجرد رأي ف الرواية و والله بشكر الظروف اللي وقعت الرواية دي ف ايدي 💚
مستني جزء تاني من الرواية
مستني اي حاجة لمحمود عموماً 😅
#الواد_إسلام_بتاع_الكتب 😁